Sukuri seku Yugu
Jonathan Aloro Nyaga
Wiehan de Jager
Kaju 'bero na, ku Sukuri seku Yugu saka ku gele ku toli'ba ku kpenya ku'de kilo. Kara konda kuliyata kine giri kugele.
Kpenya na ŋiyoro ku kopuko de bayi kasi ko ididiŋiini.
Luŋa le'de gele, kana a'dukia rile. Yugu utuji pajo i galadu na nyosu. Lepe yite iboni ku a kanya.
"Kiko le'de laga lo woworoniki wulewule kata!" Yugu lo kuliya.
Ibona toto naga ana'bu, Sukuri a yo'yurame laga a lo'bu. Lepe apoki ipependa na kupi ti kpenya laga worisi kasi kara laga atatuwa kilo.
"Kuyi ripe kuwo kugele kaya kupi kinie," lepe na kuliya. "Diya yi i woworo wulewule."
I bileji katayu, Yugu laga ku libira 'du, kuwa de lepe nyelo 'doya riba na anje. Wuleŋa gele lepe a ŋiyoro kaŋo ku kopuko naga a na'bu na'bu a koloro sukuri kayu.
Sukuri tete akanya riba na. Lepe a koloki libiralo i kabati kiyu duga utu i koku yu ku derakinda ŋaji kanye kilo 'dilo.
'Bo ku'de kilo kpenya ameri Yugu i ŋiyoro yu. Kara a magu Sukuri i tikinda nase libira lo se kukundi kopuko kase.
Wuleŋa kpenya rodi apoki iŋiŋiyutu i'diko yu.
Kpenyati na teyitundo libira a'dute na, aku momorani Sukuri i 'baa yu.
Kuwa de ŋaji ti lepe kine a'dumara libiralo i bironiki, kara akoloki libiralo i sinyaki kata.
Inu lu'baŋa de, Yugu ayite. Lepe a magu libira lonye lo kusukindi kupi laga a kpokpoyiga kanye woro yu kile.
Sukuri aga 'yu libira lo i koku yu, lepe kaga'yu i 'baa kata yu. 'Bo libira lo aku riye.
"Inga tikina luŋa gele," Sukuri na ma'yu mugu ku Yugu. "Do bulo sukindo kopuko konu kine modo ŋiyoro konu ga'yu na nyosu yu 'do."
"Luŋa gele 'du," Yugu lo kuliya. "Kudo aku riyo libira liyolo, do i titikinda na ŋiro nonu naga gele na arope."
Loŋa lo bo lo kuyeŋundi, lepe a ku momorani Sukuri kunu kokodu kaana i sinyaki kata yu 'bo libira lo 'bayi. Kuwa de Yugu asurunda kani i tore na Sukuri gele na kini duga'do 'dokoro lepe.
Ŋiyu ilu luŋa de tojo i tinade, kuYugu lo poonda, lepe momorani Sukuri kunu kokodu kaana isinyaki kata yu.
Ku kodudo na kopukoni na Yugu na 'duu, Sukuri tepijo torila kanye kine, "Yoŋeta 'beri kaŋo i kaa naga renjele na ku a natiyo kaŋo."
Duga kara rugo adi, "Yi ani gbo'da mamalini. Yi wowoke."
You are free to download, copy, translate or adapt this story and use the illustrations as long as you attribute in the following way:
Sukuri seku Yugu
Author - Ann Nduku
Translation - Jonathan Aloro Nyaga
Illustration - Wiehan de Jager
Language - Kakwa
Level - Longer paragraphs
© Africa Storybook Initiative 2014
Creative Commons: Attribution 4.0
Source www.africanstorybook.org
Original source www.akdn.org
