Ulubuto Lunoono: Inshimi ya kwa Wangari Maathai
Theresa Mwewa
Maya Marshak
Mu
mushi waba ku mutentemuko wa lupili ulwa ku Kenya ku kabanga ka Africa,
umukashana umwaice aalebomba na banyina mwibala. Ishina lyakwe aali ni
Wangari.
Wangari
alitemenwe ukuba panse. Mwibala lya fyakulya ilya lupwa lwabo, aleefukula
umushili ukubomfya iccela. Alimbile imbuto mu mushili uwakaba.
Inshita
ya kasuba aatemenwe saana lilyafye akasuba kashilawa. Wangari aaleinuka fye
nga cakuti kwafita saana icakuti umuntu tekuti amone ifimenwa. Pakuya
aalepita mukashila katondo mu mabala no kuciluka imimana.
Wangari
aali mwana uwa cenjela kabili aalefwaisha ukuya ku sukulu. Lelo bawishi na
banyina balefwaya ukuti aleikala pang’anda no kubafwa imilimo. Ilyo aafikile
pa myaka yakufyalwa cine-lubali, ndume yakwe umukalamba aashiniine abafyashi
bakwe ukusuminisha Wangari ukuya ku sukulu.
Aalitemenwe
ukusambilila! Wangari asambilile ifyafulilako muli cila citabo abelengele.
Aalibombele bwino saana pa sukulu icakuti balimwitile ku United States of
America. Wangari aalitemenwe cibi! Aalefwaya ukwishibilapo infingi pa lwe
sonde.
Pa
Univesiti (isukulu likalamba) ya ku America, Wangari aalisambilile ifintu
ifingi ifipya. Aasambilile palwa fimenwa nefyo fikula. Nakabili aibukishe
ifyo aakulile: ukuteya ifyangalo na bandume yakwe mu cintelelwe ca miti ya mu
mpanga shaemba isha ku Kenya.
Ilyo
aaletwalilila amasambililo, aibukile ifyo atemenwe abena Kenya ngashi.
Aalefwaya ukuti babe ne nsansa na ubuntungwa. Ukusambilila ifyafulilako
kwalengele ebukishe kumwabo ku Africa.
Panuma
yakupwisha amasambililo, aabweleele ku Kenya. Lelo icalo cakwe ninshi
calicinja. Kwali amafamu ayakalamba mpanga yonse. Ba namayo tabaakweete
inkuni shakukosesha umulilo wakwipikilapo. Abantu baali baapina na bana ne
nsala.
Wangari
aalishibe ifyakucita. Aafundile ba namayo ifya kulimba imiti ukufuma ku
mbuto. Ba namayo baalishitishe imiti na ukubomfya ulupiya ku kusakamana
indupwa shabo. Ba namayo balitemenwe nganshi. Wangari aali nabaafwa ukuyumfwa
abamaka kabili abakosa.
Mukupita
kwanshita, imiti ipya yalikulile na ukusanguka imishitu, na imimana yatampile
ukukomkoloka nakabili. Imbila ya kwa Wangari yalisalangene mu Africa yonse.
Ilelo, iminshipendwa ya miti yaalikula ukufuma kumbuto sha kwa Wangari.
Wangari
aali na bombesha. Abantu isonde lyonse baishile ishiba palwa kwa Wangari,
kabili bamupeele icilambu icaya ululumbi. Citwa ukuti “Nobel Peace Prize”,
kabili aali namayo uwantanshi mu Africa ukupokelela ici cilambu.
Wangari
afwile mu 2011, lelo kuti twatontonkanya pali ena ilyo lyonse twamona umuti
uwayemba.
You are free to download, copy, translate or adapt this story and use the illustrations as long as you attribute in the following way:
Ulubuto Lunoono: Inshimi ya kwa Wangari Maathai
Author - Nicola Rijsdijk
Translation - Theresa Mwewa
Illustration - Maya Marshak
Language - IciBemba
Level - First paragraphs
© Nicola Rijsdijk, Maya Marshak, Tarryn-Anne Anderson, Bookdash.org and African Storybook Initiative 2015
Creative Commons: Attribution 4.0
Source www.africanstorybook.org
Original source www.bookdash.org
