Kũgiita ĩgamba
Tarsilla Thuranira
Vusi Malindi
Ntũũra yakwa yaarĩ na mathĩĩna jamaingĩ. Twekaga mũcitarĩ jũmũraja gũtaa rũũjĩ gacumene kamwe.
Twetagĩĩra irio biria biejani ni bangĩ.
Twaingaga nyomba cĩetũ thaa irio nĩuntũ bwa gũkĩra amba.
Aana babaingĩ baratiga gwĩta cukuru.
Twaarĩ twaritaga ngũgĩ cia nyomba ntũũrene ingĩ.
Tũijĩ twathiurũkaga ntũũrene antũ bangĩ bakĩritaga ngũgĩ miundene ya antũ.
Ruuo rwaurutana, marataci jarĩa jategi jagacuura mĩtĩne na ndwegone.
Antũ batemangagwa nĩ cuuba inkũũ irĩa ciatei oouu.
Ntũkũ ĩmwe, mĩberethi ĩrawa rũũjĩ na ikiiri biraa biitheri.
Baaba areta nyomba ĩmwe na ĩngĩ akĩuragia antũ ntũũrene beeje mũcemanione.
Antũ baroothũrana ruungu rwa gĩtina kĩa mũtĩ jũmũnene na barathikĩra.
Baaba ararũngama na arauga, "Tũrienda tũrite ngũgĩ tũgwatanĩrĩte nĩkenda tuthiria thĩĩna cĩetũ."
Koome wa ũkũrũ bwa miaka ĩnaana, akari nthĩ mũgogone aragandũka arauga, "Ũũni ng'atetheeria na kũtheria."
Mwekũrũ ũmwe arauga, "Ekũrũ no bagwatane nani tũkũrie irio."
Mũkũrũ ũngĩ ararungama arauga, "Arũme bakenja kĩthima."
Twinthe tũragandũka na kajũ kamwe, "No mwanka tũgarure ũtũũro bwetũ."
Kuuma ntũkũ ĩuu tũrarita ngũgĩ tũgwatanĩrĩte kenda tũthiria mathĩĩna jetũ.
You are free to download, copy, translate or adapt this story and use the illustrations as long as you attribute in the following way:
Kũgiita ĩgamba
Author - Ursula Nafula
Translation - Tarsilla Thuranira
Illustration - Vusi Malindi
Language - Kῖmῖῖrũ
Level - First paragraphs
© African Storybook Initiative 2015
Creative Commons: Attribution 4.0
Source www.africanstorybook.org
