African Storybook - Jĩng Vu seseere: Ruu ka yuu Waawi Maading

Jĩng Vu seseere: Ruu ka yuu Waawi Maading

Ntari Danladi

Maya Marshak

Ka doolaa ɓɔɔ ka yuu kɔ̀pɔ hɛ͂ɛrɛ, zang ɓaa nɛɛ Yɔrɔ, ɓɔɔ ka nɔng ɓɔ̀ɔ làa nwáng kagn, ka tipi Najeriya, Jaa zang soro ɓɔɔgn, zang ɓaa wu nɛɛ Waawi, ri palɛ shoonang ka láa jaa nɛɛ Niiɓɛ.

Waawi kasɛ nwannang ka biling. Ka laa jáa ɓarɛ, hulu tipi nɛɛ jaa gbaa. Ɓàarɛ́ jĩng vuu seseere ka tipi ɓɔɔ nwa͂a lulupu ɓɛɛ.

Diki ɓɔɔ kasɛ ka doola ɓi nɛɛ nyalarang. Nɔng nɛɛ tɔ̀ɔ́ tɔ, naa ɓɔɔ wu zii jĩng vuu takpang, Waawi zii kaa wukɔ nɛɛ làa gãa dannang ɓiɓɛ aa tɔ. Jaa bìí sɔɔrɔ gbalang ɓɔɔ tɔ͂tɔrɔng ka laa jaa bìí, wu ti sɔ̀ɔ rang, tɔɔ, wu daa gãa.

Waawi zu͂ng ɓi dɔɔli, a kasɛ nɛɛ wu daa nɔ́ng labeenang. Rɛɛ ɓeenaa nɛɛ ɓeedaa ri kasɛ nɛɛ wu nwáng ka gãa, tɔɔ, wu yi ri naa ka shoonang. Ka ɓɔɔ wu dàa sáa manziti tɔ, ɓeezu͂ngbang gàa rɛɛ ɓeeda nɛɛ ɓeenaa nɛɛ, ri yaa wu, wu dàa nɔng labeenang jong.

Jaa bìí kasɛ vuu kpɛ͂ɛrɛnang dɔɔli!. Waawi kpɛ͂ɛrɛ vuu dɔɔli ka labeenang ɓɔɔ wu gã ɓɛɛ. Jaa bì́í zunu͂ng vuu dɔɔli ka nɔng labeenang, ka ruu nɔngkɔ, zang ɓaa wu nyaa, nɛɛ wu kpɛ͂ɛrɛ vuu ka labeenang ɓɔ̀ɔ́ Amadu Bello, ka Zariya. Waawi tãa tinang dɔɔli! Jaa bìí kasɛ nɛɛ wu zii naa nwannang dalɛ koo kaa tɔ kn.

Ka lebeenang bang ɓɔ̀ɔ́ Ahmadu Bello, ɓɔɔ ka Zariya, Waawi kpɛ͂ɛrɛ vuu shɔɔ dɔɔli. Jaa bìí kpɛ͂ɛrɛ laa, a ɓɔɔ naa ɓɔɔ ri bangkɛ ɓɛɛ. A Jaa bìí rɛ͂rɛ naa ɓɔɔ ri bang ɓɛɛ. Pi͂iri nɛɛ rɛɛ ɓéenaa ka sutu doolaa larang Yɔrɔ.

Ka vuu ɓɔɔ wu mantɛ, zii káa wukɔ nɛɛ wu kasɛ zang tipi Taraba katɔ. Jaa bìí kasɛ nɛɛ ri ta͂a tĩnang, ri ti nwang tɔ͂ɔ. Jaa bìí ti mantɛ vuu kana, a ti rɛ͂rɛ gãa ɓiɓɛ ɓɔɔ ka Yɔrɔ ɓɛɛ.

Ka diki ɓɔɔ wu hangsɛ nyaa vuu kpɛ͂ɛrɛnang tɔ, a gbãayu ka tɛbang (tipi) ɓiɓɛ ka Taraba. A ĩi nɔng nɛɛ dãng kɔ͂sɔ tɔ. Láajaa ti bang tɔ. Zang soro ri ĩi laa vuu nwa͂anang takpang. Shɔnzang ri nwang kaa bii rang, a wujɛ nwang ka nɛɛ yɔkɔ.

Waawi zii vuu ɓɔɔ wu palɛ ɓi tɔ. Jaa bìí mantɛ zang soro naa ɓɔɔ ri shɔlɔ laa ɓɛɛ. Zang soro ri ma͂lɛ laa ri yiti gãa ɓarɛ nɛɛ mani. Zang soro bìí, ri tãa tĩnang dɔɔli. Waawi yi ri naa tɔ ka bii, ka ɓɔɔ rii ĩi kaka, a ri ti lakɛ tɔ ɓɛɛ.

Ka ɓɔɔ diki naa ɓa tɔ,a laa shɔɔ naa bangkɛ, a ri larang kaa tɔkn. A ràng naa lurɛ a zɛ͂ɛ kaa tɔkn. A yèé Waawi baa tipi Najeriya kaa nandon. Kãntang laa dɔɔli ri bangkɛ tɔ nandon, rɛɛ jĩng laa ɓɔɔ Waawi shɔ ɓɛɛ.

Waawi palɛ shoonang tɔ tɔ͂ɔ, shɔnzang nandon ka tipi Najeriya, ri ti zii tɔ, a rii ti a wu nu͂ng tɔ͂ɔ, ɓ̀ɔɔ ta nu͂ng ɓiɓɛ tɔkn ɓɔɔ zang ɓaa nɛɛ laranbang zang Najeriya ɓɛɛ, a wukɔ ti zang soro Mumuye ɓɔɔ gáayu vu tɔ͂ɔ tanang ɓɔɔ zang gɔmnati a zang ɓɛɛ.

Waawi gèe varɛ ka saa labang ziti tu kopi tu mandɛ͂ɛti (2019). Ruu kpaa danggn ɓiɓɛ ka wukɔ, ruu nɛɛ zii laa tɔ͂ɔ keɓe tɔ ɓɛɛ.

You are free to download, copy, translate or adapt this story and use the illustrations as long as you attribute in the following way:

Jĩng Vu seseere: Ruu ka yuu Waawi Maading

Author - Nicola Rijsdijk
Translation - Ntari Danladi
Illustration - Maya Marshak
Language - Mumuye
Level - Longer paragraphs

© Nicola Rijsdijk, Maya Marshak, Tarryn-Anne Anderson, Bookdash.org and African Storybook Initiative 2015
Creative Commons: Attribution 4.0
Source www.africanstorybook.org
Original source www.bookdash.org