African Storybook - Ingokho ni Ikhosi

Ingokho ni Ikhosi

Milton Eridad Shissa

Wiehan de Jager

Aabawo khaalekho, Ingokho ni Ikhosi baamenyatsaka atweela mu lukoosi ni binywiinywi bibiindi.

Buli shiindu baashikholatsakila atweela.

Shifukhu shitweela, akwawo intsala khu shibala. Ikhosi yaakyeenda yaatsya i aleeyi naabi khuusakhayo biilyo. Yaakobolayo ingo nga yaaluwile naabi.

Yeelomela inyene iri, "Yaakhiile khuubawo isaambo inyaangu iye khuukyeenda!"

Nga baamalile khuukona buulayi mu shilo, Ingokho yaareera shishambaaso she kamakyesi.

Kila irakikha khuubusaka kamooya ke binywiinywi byashaabwe bibyafwa khaale. Yaaloma iri, "Khakhubinabile khu ngaaki khwe kamooya keefwe kano. Manya isho kane shikhwaanguyisile
khuukyeenda khweefwe."

Khu shaalo isho, Ikhosi yonyene niyo uyabakho ni mpiso. Kila niyo inyoowa khukhwiinabilakho. Lubaluba, yaapamburukha yaatsya, nga iraambisa tsindaha tsine, yaalekha Ingokho nga ishiili aasi iyo.

Lwanyumakho, Ingokho yaaluwa khuunaba. Iryo yaabiikha impiso khukabada, yaatsya mu ifuumbilo
khuuteekhelakho babaana baayo biilyo.

Ne binywiinywi bibiramile byaaba byaboone Ikhosi nga ipamburukha itsya. Kila biloomba Ingokho khuubiwakho impiso nabyo binabe tsindaha.

Mu mbuka ifwiiti iri binywiinywi byaaba biikali naabi bibipamburukhila mu ngaaki.

Ne khanywiinywi khakhaakamayo ni khaakobosa impiso, Ingokho siyabawo ta. Kila bubwaana bwe ngokho busuta impiso tsana iyo bwaatsya bwenyayisa.

Ne ni bwaba bwaluyile khukhwiinyaha, bwalekha impiso tsana mu muyekhe.

Ne lwanyumakho khu nyaanga tse angoloobe, Ikhosi yaakobola. Yaaloomba iri bamukobosele impiso anabe kamooya kakatendemeele nga ni yaba ipamburukha.

Ingokho yaatsya yaalola khu kabada. Yaatsya mwifumbilo. Yaatsya yaalola khu lwaanyi. Ne yaalekha khunyoola impiso ta.

Kila Ingokho iloomba Ikhosi iri, "N'umbekho busa shifukhu shiindi shitweela. Nio lwanyuma kane unyalise khuunaba tsindaha tsoowo utsye usakhe bya khulya."

Ikhosi nayo yeelamo ari, "Shifukhu shiindi shitweela shonyene! Ne nga waakhunyoola impiso ta, kane umbekho mutweela khu baana boowo, khuuwaanda impiso iyo."

Ikhosi ni yakobola khu shifukhu shisheelakho, yaanyoola nga Ingokho ili khuutakhulaka mu muyekhe, ne nga mbaawo impiso ta.

Kila Ikhosi yiwuta aasi kumuluundi mutweela, yaawutula khanywiinywi khatweela yaapamburukha yaatsya.

Khukhwaamila abweenewo, buli isi Ikhosi ibonekhela inyoola nga Ingokho ishitakhulaka mu muyekhe, khuuweentsa impiso yabeene.

Buli isi shishiniini she Ikhosi shibonekhelakho busa shiri aasi khu shibala, Ingokho ireewula bubwaana bwayo iri, "Rura khu lwaanyi, mutime mutsye mwiibise."

You are free to download, copy, translate or adapt this story and use the illustrations as long as you attribute in the following way:

Ingokho ni Ikhosi

Author - Ann Nduku
Translation - Milton Eridad Shissa
Illustration - Wiehan de Jager
Language - Lumasaaba
Level - Read aloud