Ensigo Entono
Rebecca Ndhibogeza
Maya Marshak
Mu byalo ku nsozi dha kenya mu mukwampa gw'ebugwandhuba bwa Afirika, omguna ono mu maina ga Wangali mweyakolanga einho maamaghe
Omuguna ono yayendanga inho okuba ku luya. Mu nimiro yaibwe ey'emere, yamenha menhamu eitaka nga akozesa ekikoona. we yamaliriza okukoona yaniga ensigo mu aghaali ekisuusu.
Ebiseera Wangali byeyayendanga einho byali bya lwa igulo nga endhuba egwire. Obwire we bwaziba okubona ebirime, Wangali yamanha nga ekyo n'ekyali ekiseera eky'okuja eka eghaibwe. Mu kutambula yabita mu bugira obutonioli einho n'okubuuka emiiga aje.
Wangali ono yali mughala mugezi nga era talinda kumukoba bati aje kwisomero ayenga maamaghe ni bbaabbaghe baali bendanga asigale abayambeku n'emirimo ej'aghaka. We yagheza emyaka omusanvu mwanhina omukulu yasendasenda abazaire baibwe bamulobere okuja kwisomero.
Wangali yayega bingi inho kuba yali ayenda inho okusoma ebitabo. Yakolanga bukalamu inho kwisomero era yaayetebwa mu Amerika. Wangali ono yali musanhufu kuba yayenda kutegeera bingi ebigema ku nsi yoonayona.
Ku yunivaasite ya Amerika, Wangali yayega ebintu bingi inho. Yasoma ku birime n'engeri yebabisimbamu era yaidhukira engeri yeyalimanga eka, okuzaanha kwe bazaanhanga ni baanhina mu byensense by'emiti mu bibira eby'ekenya ebirungi einho.
We yakomanga okusoma, we yakomanga okutegeera nga ayenda inho abantu ba kenya kuba yali ayenda babe basanhufu nga bazira buzibu era ekyo kyamuleetera okwenda inho ensiiye Afirika.
Weyamaliriza okusoma yaila eghaibwe e Kenya yeyayagaana nga ensi ekyuse. Yayagaana agataka aganene nga gaidwire bigo bya nte, obwavu, abakazi okubula enku edh'okufumba n'endhala mu baana.
Wangali yamala yaategeera ki eky'okukola era agho gheena agho yainhama okusomesa abakazi engeri ey'okusimba emiti okuva mu nsigo. Abakazi baatunda emiti baafuna empiiya edhaabasobozesanga okulabirira amaka gaibwe. Abakazi bano baali basanhufu inho n'omughala ono wangali eyabayamba okwewullira nga ba maani inho era abakozi.
Ebiseera webyaja, emiti gino emiyaaka gyafuuka ebibira n'emiiga gya tandiika okuyuyika nga gibitamu kayiri. Obubaka bwa Wangali obw'okusimba emiti okuva mu nsigo tibwakoma Kenya yonka aye ni mubiketezo ebindi okubuna Afirika. Buti obukaire n'obukaire obw'emiti gikuze okuva mu nsigo.
Wangali yakola inho omulimo era bantu okubuna ensi Afirika yoonayoona baayega okusimba emiti gyaibwe okuva mu nsigo era ekyo kyamuleetera okughangula ekirabo eky'emirembe n'emirembe. Esaawa eno Wangali amanikiibwa nga omukazi eyasooka okufuna ekirabo ng'oti n'ekyo.
Mwana mughala ono Wangali yava mu bulamu obw'ensi mu mwaka ogwa 2011 aye abantu bakaamuloghozaaku buli kiseera we babona emiti emirungi.
You are free to download, copy, translate or adapt this story and use the illustrations as long as you attribute in the following way:
Ensigo Entono
Author - Nicola Rijsdijk
Translation - Rebecca Ndhibogeza
Illustration - Maya Marshak
Language - Lusoga
Level - Longer paragraphs
© Nicola Rijsdijk, Maya Marshak, Tarryn-Anne Anderson, Bookdash.org and African Storybook Initiative 2015
Creative Commons: Attribution 4.0
Source www.africanstorybook.org
Original source www.bookdash.org
