African Storybook - Meemè yee wùn à yaàyá

Meemè yee wùn à yaàyá

Beatrice Tafon Takeh and Mbinkar Emmanuel Keelen

Catherine Groenewald

Odoŋgo wùn Apiyo yii dzə́ e mvə̀m laʼ wùn à tàr wov. Áwune-eè báʼti mo á lo a dù fo meèmè ye dáa. Áwune yòʼ-oò du cáʼ a dzə̀ meèmè. Áwune-eè taʼ e dù e ghan yàá wov. Yàá-aà dzə́ e ghaa kibaŋ ke kuʼùn kí, e ntèʼ yìmòʼ fo á yii rə́si koó sə́.

Odoŋgo wùn Apiyo-oò yú wún wóv e juŋ bìʼ fo kfə̀n siìn ghán se áwune kfə̀n du e ghan yàá. Áwune wáy vifá aáwuné vibàm, e nèn bàʼtí mo áwune bvəə́shi e dù ghán kwaʼ dà. Áwune yoʼ yù fó buuné. Áwune ku suŋnín suŋnín vitsə́ʼ vifur kùm meemè.

Wáa dzə kijàvndzə kijàvndzə áwune nèn nə̀ə́ e bàá wov mótù, e nèn a dù e ntèʼ. Áwune-eè bàʼàr agwan, e bàʼàr nyám se kwaʼ, e bàʼàr sa kwáʼ se tii. Áwune du bèy táŋ a mótù, kfə̀n yov luŋ si.

Ntàm lòo dàr, wóné nèn dòrkír, e nèn lò a buuné.

Á lò ji á meé e ntèʼ, bàá nèn yìm Odoŋgo wùn Apiyo fo mbuùné. Áwune nèn yèn Nyar-Kanyada, a wù dzə́ meemè e ghàm e sar kici. Aáwune làm nsàv Nyar-Kanyada dzə̀ jii, "ŋgon juu yeé kanyada." Wù-uù dzə̀ kintav ke wiíy, a wù kfə̀n kiʼ kijuŋ.

Wù səə́si áwune e wày é lav, e nèn a cèŋ, a kaarí rumlav a yòv luŋ à sheʼrí. Wón won vəə́ wáa yú vijuŋ, e nèn a forí wun vifá ve á wiyin shó fo mvə̀m laʼ. Odoŋgo suúy jii, "Tòmbìy mvə̀ʼ fómo wom." Apiyo sháʼnén jii, "Àáya, tombìy mvə̀ʼ a dzə̀ wóom."

Yaàyá mvə̀ʼtì afómo ve wón woné foon viy, e nèn səə̀vì áwune.

Odoŋgo wùn Apiyo nèn lo e fəə̀ fó ndzə, e nèn dù à jùm alàlàʼ wùn à menə́n mè.

Áwune-eè kóʼ vicí, líy tókír e mendzə̀v-meé kibaŋ.

Ndzə lòo sən áwune nèn a kfə̀n e lav ji á wàa yíkír. Á lò ji á màysì viyíkìr, a mbuùné sí koó ne.

Ndzə́ bvəə́shí e jàv, tàr à wòn vin nèn kfə̀n é bàm e mvə̀m laʼ, e màʼtì áwune wùn à Nyar-Kanyada.

Odoŋgo wùn Apiyo-oò sə́ yàá wov lim lim seé lav. Áwune-eè tú mendzə́v, sív meŋkaʼ. Áwune lo, á wàa baʼtí wúm, e kfə̀n a keŋ nyóo fó sum.

Nyar-kanyada-aà yèʼéy wón won və́ mo dzə̀ á fèr viyíkìr vee yí wùn à ncèví. Wù-uù dìn aáwune mo á yii naa sáŋ e kùkùnor, nèn yí wùn à sə ye tonèn.

Wáa dzə kijàvndzə kímóʼkí, Odoŋgo lì anàʼ yàá və ji wun waà du e yiír. Nàʼ nèn lèʼ e nə̀ə́ e wir sum fó gháŋ. Ŋgaà sùm yú nyár wùn Odoŋgo e nèn a taŋnén ji wun lo e lèm a nàʼ biʼ fo wù yiin á vifá və́. Mo kishiíy kin ki shaàn bó wan vən yòʼ-oò dzəə wìy e biìmé ji nàʼ kfən tàʼa shuu.

Wáa dzə e kímóʼ kee kishiíy kí, wón víyi nèn dù e way wùn à Nyar-Kanyada. Wù-uù kér kibàn ké way fo wù-uù fiinè vifoórí vee vikwiíy, fiine shúkà wùn a shuvi. Apiyo-oò lo wù wàa kòŋ fó a yòŋ káv se vifa e wìr ve á wiy ji á yún vifáa. Wìr-iì yún vifá, Odoŋgo sə̀ wun, e bàʼtí.

Ndzə jí wìr dzə̀m nò tii. Áwune lo, á wàa sə yàá a taŋ mbàm se wù kavin.

Bó ntàm yòʼ dàr, meemè-eè nèn mày. Kí nèn a dzə ji wóné kú a kfən a e mvə̀m laʼ. Nyar-Kanyada fó tán e Odoŋgo, e fò shòótà, e Apiyo e nèn bàʼtí kúr ghan yev.

Bàá wov wíy ji wun lí a áwune, la áwune yoʼ a koŋ e dù. Áwune nèn a lon Nyar-Kanyada ji wùn áwune wáa dù a e mvə̀mlaʼ wír adzə̀m. Wu ŋwèʼ shé e sùúy jii, "A dzə̀ yaàyá moo mo ben, la wù yòʼ dzə̀ʼə̀m e mvəmlaʼ. M shiy ghán se vèn siì yií wìy e ghan mo."

Odoŋgo wun Apiyo tátí e baàmé yaàyá kitávín, e nèn shàʼtì wun ji á bèr á ne.

Odoŋgo wùn Apiyo wìy kfə̀n é bàm e lavŋwàʼ, e fèr e ŋkar sév sí mo dzəʼə̀m yeé ntèʼé dzəə̀n. Wónlè ámóʼó-oò yén kév ji dzəʼə̀m ye juŋe dzə̀ a yeé mvəmlaʼ. Ámóʼó wáa yòŋ kév ji dzəʼə̀m ye juŋe dzə̀ á yeé ntèʼ. Kinyo ke kuʼùn kí dzə̀ jii, wìr dzə̀m-eè lo e bìnsí ji Odoŋgo wun Apiyo kér a yàá wo ghaʼán.

You are free to download, copy, translate or adapt this story and use the illustrations as long as you attribute in the following way:

Meemè yee wùn à yaàyá

Author - Violet Otieno
Translation - Beatrice Tafon Takeh and Mbinkar Emmanuel Keelen
Illustration - Catherine Groenewald
Language - Lámnsoʼ
Level - First paragraphs