Peu ye nnyanennyane
Nal'ibali
Maya Marshak
Mo motseng, metheošeng ya Mount Kenya kua East Africa, mosetsana yo monnyane o be a šoma ka mašemong le mmagwe.
Leina la gagwe e be e le Wangari.
Wangari o be a rata go ba ka ntle. Ka tšhemong ya dijo ya gabo o be a epa mabu ka sabole ya gagwe. O be a šitlela dipeu tše dinnyanenyane mmung wa borutho.
Nako ye a e ratago kudu mo letšatšing ke mathapama. Ge go be go fifetše kudu dimela di sa bonale, Wangari o be a tseba gore ke nako ya go gae.
O be a latela tselana ye sese ya go ngaya ka mašemong, a tšama a tshela dinoka.
Wangari e be e le ngwana wa bohlale gomme a fela pelo ya go ya sekolong. Efela mmagwe le tatagwe ba be ba sa nyake a eya ka ge ba nyaka a ba thuša ka gae.
Ge a be a na le mengwaga ye šupa, mogolo wa gagwe wa mošemane o tutueditše batswadi gore ba mo dumelele go ya sekolong.
O be a rata go ithuta!
Wangari o ithutile tše dintši ka puku ye nngwe le ye nngwe yeo a bego a e bala. O šomile botse sekolong ka fao a ilego a laletšwa go yo ithuta kua United States of America.
Wangari o be a thabile! O be a nyaka go tseba tše dintši ka ga lefase.
Kua yunibesithing ya Amerika, Wangari o ithutile dilo tše dintši tše diswa. O ithutile ka ga dimela, le ka fao di golago ka gona. O ile a gopola ka fao a gotšego ka gona: a bapala meraloko le bana ba gabo ba bašemane meriting ya mehlare ka lešokeng le le botse la Kenya.
Ge a be a ithuta go ya pele, o be a lemoga kudu ka fao a ratago batho ba Kenya ka gona. O be a nyaka gore ba thabe ba be ba lokologe.
Ge a be a ithuta go ya pele, o be a gopola legae la gagwe la Afrika kudu.
O ile go fetša dithuto tša gagwe a boela Kenya. Efela naga ya gabo e be e fetogile. Naga e be e na le dipolase tše dikgolokgolo. Basadi ba be ba se na dikgong tša go dira mello ya go apea.
Batho ba be ba hlaka gomme bana ba swerwe ke tlala.
Wangari o be a tseba seo a ka se dirago. O rutile basadi go bjala dimela ka dipeu.
Basadi ba ile ba rekiša mehlare gomme ba diriša tšhelete ya gona go hlokomela ba malapa a bona. Basadi ba be ba thabile kudu. Wangari o ba thušitše gore ba ikwe ba na le maatla ba tiile.
Ge nako e dutša e sepela, mehlare ye meswa e ile ya fetoga mašoka, gomme dinoka tša thoma go elela gape. Molaetša wa Wangari wa phatlalala Afrika.
Lehono, go metše mehlare ye dimilione go tšwa dipeung tša Wangari.
Wangari o šomile ka maatla. Lefaseng ka bophara batho ba ile ba lemoga seo, gomme a fiwa sefoka sa go tuma. Se bitšwa Nobel Peace Prize, gomme e bile mosadi wa Afrika wa mathomo wa go se hwetša.
Wangari o ile a hlokagala ka 2011, efela ka mehla ge re bona mohlare o mobotse re ka mo gopola.
You are free to download, copy, translate or adapt this story and use the illustrations as long as you attribute in the following way:
Peu ye nnyanennyane
Author - Nicola Rijsdijk
Translation - Nal'ibali
Illustration - Maya Marshak
Language - Sepedi
Level - Longer paragraphs
© Nicola Rijsdijk, Maya Marshak, Tarryn-Anne Anderson, Bookdash.org and African Storybook Initiative 2015
Creative Commons: Attribution 4.0
Source www.africanstorybook.org
Original source www.bookdash.org
