Maguru o abela diphoofolo maoto
Dikeledi Queen Shai
Wiehan de Jager
Kgalekgale diphoofolo di be di se na maoto. Di be di gogoba fase.
Ke batho fela bao ba bego ba na le maoto ka lebaka la go re Maguru o be a ba file maoto.
Ka letšatši le lengwe Maguru o ile a tšea sephetho sa go fa phoofolo ye nngwe le ye nngwe maoto. O ile a sepela go dikologa motse a dira tsebišo yeo ka segodišalentšu. O be a rata go re phoofolo ye nngwe le ye nngwe e sepele bjalo ka motho.
Diphoofolo di ile tša thaba kudu ge di ekwa go re di tlilo fiwa maoto. Phoofolo ye nngwe le ye nngwe e be e rata go ba le maoto gore e kgone go sepela le go kitima. Di ile tša opela, di pokapoketša mesela le go phuphusela ka mafofa a tšona.
Diphoofolo di ile tša kgobokana go ahlaahla ka mokgwa woo di itemogelago bohloko bja go gogoba. Di be di ngwapšwa dimpa ke mobu mo fase. Maoto a tla di thuša gape le go ema tša kgona go bona kgole go swana le batho.
Ge letšatši le fihlile, diphoofolo tše ntši di ile tša gogoba di lebile lapeng la Maguru go yo ikhweletša maoto. Dithutlwa, ditau, ditlou, mebutla, dikwena le dinonyana di ile tša ema mothalading tša letela go fiwa maoto.
Phoofolo ye nngwe le ye nngwe e ile ya fiwa maoto a mane. Dinonyana tšona di ile tša fiwa maoto a mabedi a mabedi.
Morago ga go fiwa maoto, diphofolo di ile tša se sa swana le pele. Tše dingwe di ile tša bina ka lethabo. Tše dingwe di be di swere bothata bja go ithuta go sepela ka maoto, di bile di wela fase.
Di ile tša sepela go dikologa le motse di tšama di kgantšhetša batho maoto a tšona. Diphoofolo ka moka di ile tša goelela tša re, "Re ka se sa gogoba gape."
Phoofolo ya mafelelo mothalading wa go fiwa maoto e be e le Legokolodi. Maguru o ile a botšiša a re, "Na go na le yo mongwe ka morago ga gago?" "Aowa, ke nna wa mafelelo," Legokolodi la araba ka go realo.
Maguru a nagana, "Ge e le go re ga go na yo mongwe, nna ke tla dira eng ka maoto ao a šetšego?" Maguru o ile a fa Legokolodi maoto ka moka ao a šetšego.
Legokolodi le ile la sepela le thabile kudu ka ge le filwe maoto a mantši. "Ke tla kgona go sepela ka lebelo go feta diphoofolo tše dingwe," la nagana bjalo.
Ge Legokolodi le se no tloga, noga ya fihla ka lapeng la Maguru. "Maguru, ke kgopela gore o mphe maoto le nna," Noga ya kgopela ka tsela yeo.
"Ke file diphoofolo maoto ka moka. Na wena o be o le kae?" Maguru a botšiša. "Ke be ke gateletšwe ke boroko," Noga ya fetola.
Maguru o ile a lebelela ka ntlong go bona ge eba go na le maoto ao a šetšego. Efela ga se a hwetša selo.
Maguru o ile a tšwela ka ntle a re, "Ke maswabi, Noga, maoto a fedile." Noga e ile ya swanelwa ke go gogoba e boela morago e se na maoto. Go tloga lona letšatši leo, Noga, e ile ya se sa robala kudu. Le lehono Noga e sa letetše sebaka se se latelago sa go hwetša maoto.
You are free to download, copy, translate or adapt this story and use the illustrations as long as you attribute in the following way:
Maguru o abela diphoofolo maoto
Author - Mutugi Kamundi
Translation - Dikeledi Queen Shai
Illustration - Wiehan de Jager
Language - Sepedi
Level - First paragraphs
© African Storybook Initiative 2015
Creative Commons: Attribution 4.0
Source www.africanstorybook.org
