Kwapumulo Ni Bokuku
Limbali Muyendekwa
Catherine Groenewald
SiLozi
Odongo ni Apiyo ne nebapila amoho ni bondatabona mwa tolopo. Bakeng'isa kuziba kuli nebaswanela kuyopumula nikukwabona, batalimela nako yapumulo kuli ifite. Bokukwabona nebapila mwamunzi oli kwatuko ni lisa mo mwenekuyambiwa litapi.
Odongo ni Apiyo nebatabile aifita nako yakupumula kakuli nebaswanela kuya kubokukwabona. Lizazi lisikafita kale baitukiseza kulonga libyana zabona mwamikotana. Bapalelwa kulobala kapa kunopa buloko busihu bakeng'isa musipili wabona.
Kakusasani lizazi lelitama bakala musipili wabona. Bakwela mota yabondatabona. Bafita mwamalandu nimwalisimu mokuchezwi licalo za tii. Nebasweli kubala limota zenelibafitelela nikushelana nibona mwamukwakwa inge baliba kubokukwabona.
Asekufitile kanako kakainyanyani bakatala onafo balobala nikulobala.
Bondatabona babazusa banana bo Udongo ni Apiyo asebafitili mwahae yabokukwabona. Nebafumani bokukwabona bo Nyar- Kanyanda inge baipumulisa fa museme. Libizo le la Nyar-Kanyanda mwamushobo wa siLuo italusa kuli, 'musali wamwana wabatu bakwa Kanyanda'. Nelimucembele yanasaikutwa nikutiya hape nibunde.
Nyar-Kanyanda atambula baenyi bahae nikukala kulumelisana hape nikukala kuhopela mwandu. Bayikulu bahae Nyar-Kanyanda bataba ahulu nikumutambeka limpo zahae zezwelela kwa tolopo. "Kakukala amukwahulule mpo yezwa kuna," abulela Odongo. "Batili, amukale yaka fokung'ozwi libizo," abulela Apiyo.
Bokukwabona asebafelize kukwahulula limpo zabona, baitumela ahulu.
Abafeza zeo Odongo ni Apiyo bazwela fande nikukala kumatisa tunyunywani nilikuhu.
Bapahama mwalikota hape nikuposa zakuposa mwa lisa.
Aselilikezi lizazi bakutela kwa hae kuli bayoca mulalelo. Basikafeza kale nikuca bakala kuozela!
Lizazi lelitama, bondatabona babasiya banana kubokukwabona bo Nyar-Kanyanda.
Odongo ni Apiyo batusa bokukwabona kwamisebezi yamwandu. Babakela mezi nikulwalela likota. Nabanganga nimayi alikuhu nikuyanga muluho wamwagadeni.
Nyar-Kanyanda aluta bayikulu bahae mwakutateyela buhobe bwakucisa ni mulo. Nimwakutateyela muloho wakucisa nilitapi.
Lizazi leling'wi, Odongo anga likomo zabukukwahae kuya kwakulisa. Zakena mwasimu Yamuuna yababapani nibokukwahae. Mulimi yo anyemela ahulu Odongo. Atongoka kuli likomu ze ukalikwalela mwamulaka wahae bakeng'isa kuli licile mwasimu yahae. Kuzwa lizazi leo, Odongo akala kumamelanga likomu aya kwakulisa.
Lizazi leling'wi hape banana baya kwa maketi amoho ni Nyar-Kanyanda. Bokukwabona nebana nisintolo monebalekiseza lepu, chuka nimulola. Apiyo atabela ahulu kubulelela batu liteko zalika zamwasintolo. Odongo yena niyena inge alonela batu bonabaleka lika mwamapulasitiki.
Asebakotokile, lizazi inge lilikezi, banwa tii. Batusa bokukwabona kubala masheleng'i yanabafumani mwalizazi leo lakulekisa.
Kono inge basikananela nihona mazazi apumulo afeela mi bakutela kubona. Nyar-Kanyada afa mpo yakomoki ku Odongo, Apiyo yena bamufa sweta. Kukwabona abalongela nizakucela mwanzila.
Bondatabona abatobanga, banana nebasalati kukutela kwa tolopo.    Bakupa bokukwabona kuli bafunduke nibona kuya kwa tolopo. Bamenya ni kuli, "Nihulile ahulu kupila mwabukuwa anikoni. Nikana nimilibelela kufitela mukatopota hape mwapumulo yetaha."
Odongo ni Apiyo bakumbatela bokukwabona nikubatubeta nikubalaeza.
Anebafitile kwasilolo, Odongo ni Apiyo bakandekela balikani babona zakwa hae. Babang'wi banana banahana kuli bupilo bwamwa tolopo kibobunde kufita bwamwa hae. Babang'wi banana kuli bwamwa hae bwafitelela bwamwa tolopo. Kono zetabisa kikuli lwalumela kuli Odongo ni Apiyo nebana ninako yende amoho nibokukwabona.
You are free to download, copy, translate or adapt this story and use the illustrations as long as you attribute in the following way:
Kwapumulo Ni Bokuku
Author - Violet Otieno
Translation - Limbali Muyendekwa
Illustration - Catherine Groenewald
Language - SiLozi
Level - Longer paragraphs
© African Storybook Initiative 2015
Creative Commons: Attribution 4.0
Source www.africanstorybook.org