Cuuti Kuli Banakulu
Eunice Mukonde-Mulenga
Catherine Groenewald
IciBemba
Odongo na Apiya baaleeikala nabawishi mukalale. Pantu balitemenwe ukuya pacuuti kuli banakulu, baleetemwa isukulu nga lyaisalika. Banakulu baleeikala kumushi mupeepi na daamu iikulu.
Odongo na Apiya baalitemenwe pantu yaali ninshita yakuya pa cuuti kuli banakulu. Ubushiku, baalongele ifyakufwala fyabo ukupekanya ubulendo. Ubushiku ubo, tabaaleele leelo baalicesheshe baaleelandafye pabulendo.
Luceelo-ceelo, baimine ubulendo bwakuya kumushi muli motoka yabaawishi. Bapitilile impili, inama shampanga namabala yatii. Baaleependa imyotoka nookwimbeenyimbo.
Ilyo papitile nshita, abaana baalilele pantu baalinakile.
Ilyo baafikile mumushi, bashi Odongo na Apiyo baaabushishe abaana. Baasangile banakulu naabasendama pampasa mwisamba lya cimuti. Banakulu baali banakashi abakosa kabil abayemba.
Banakulu baalitemenwe cibi batampile nookucinda nookwimba ulwimbo lwakusansamuka. Abeeshikulu baabo baalitemenwe nganshi icakuti baapeele banakulu ifyabupe baabaleetele. "Balileenipo ukwisula ico mileteele," efyasosele Odongo. "Balileenipo icandi," e Apiyo.
Ilyo baiswile ifyabupe, banakulu baapaalile abeeshikulu ukulingana neentambi.
Elyo Odongo na Apiya baile panse mukwikate fipelebesa neefyuuni.
Baaniinine ifimuti kabili baangele nameenshi.
Ilyo pafiitile, baabwelelemo kung'anda mukulya icakulya cabushiku. Leelo baaleele tabalaapwisha ukulya!
Ubushiku bwakonkelepo, baawishi baabaana babwelelemo kutauni. Odongo na Apiyo baashele nabanakulu.
Odongo na Apiya baaleeafwa banakulu neencito sha pang'anda. Baaleetapa amenshi nookuteebeenkuni. Baatoolele namani yankoko nookusaba umusaalu mwibala.
Banakulu bafundile abeeshikulu baabo ukunaya ubwali nookwipike sabi neeminani iyapusanapusana iya kumushi.
Uluceelo lumo, Odongo ailemukucema ing'ombe. Ing'ombe shimbi shaile mwibala lya beene. Abeene beebala baalifulilwe icibi kabili baatiile baali nookwikateng'ombe. Odongo aalisambilila ukupoosako amaano kung'ombe pakuti tashileetele imilandu.
Bushiku bumbi, abaana baile ku maliketi nabanakulu mukushitisha umusaalu, shuga neesopo. Apiyo ewatemenwe ukweba abantu imitengo yafintu. Odongo atemenwe ukulonga ifintu ifyo abantu baaleeshita.
Icungulo baafwile banakulu ukupenda indalama kabili banwiine tii.
Tapakokwele, inshiku sha kutuusha shapwa. Abaana baleekabilwa ukubwelelamo kutauni. Banakulu bapeele Odongo akasote elyo Apiyo baamupeele ica kufwala icampepo. Banakulu babalongele ifyakulya pa bulendo.
Odongo na Apiyo tabaaleefwaya ukuya kutauni. Abaana baalombele banakulu ukuti bakonke kutauni. Banakulu bamwentwile nookutila, "Ndi mukote teeti njikale mutauni nomba nga mwaisa kuno kumushi mukansanga."
Odongo na Apiya baalayene nabanakulu.
Ilyo Odongo na Apiya baabwelele kusukulu bashimikileko nabanaabo pamikalile yakumushi. Abanabo bena baatemenwe imikalile yamutauni. Leelo bonse abaana batiile banakulu Odongo na Apiyo baalikwata umutima uusuma.
You are free to download, copy, translate or adapt this story and use the illustrations as long as you attribute in the following way:
Cuuti Kuli Banakulu
Author - Violet Otieno
Translation - Eunice Mukonde-Mulenga
Illustration - Catherine Groenewald
Language - IciBemba
Level - Longer paragraphs
Translation - Eunice Mukonde-Mulenga
Illustration - Catherine Groenewald
Language - IciBemba
Level - Longer paragraphs
© African Storybook Initiative 2015
Creative Commons: Attribution 4.0
Source www.africanstorybook.org
Creative Commons: Attribution 4.0
Source www.africanstorybook.org
