Ó'dú àzɨ́nɨ ándráa àlʉ, àbírí ndè òbólókó àzɨ́nɨ káyɨ̀. Rɨ ací ásétálà sɨ̀ nyaká ndàzʉ́.
Esú ámvú àzɨ́ 'bánɨ́ cǔcǔ sazʉ́ cǔcǔ ndê nɨ́ wazʉ́ alénɨá àrì nɨ. Nè cǔcǔ àzɨ́ nípɨ tékètékè nɨ patí mà àràkàlá àzɨ́ oru lɨ́'bɨ́ lɨ́'bɨ́ nɨ mà síá.
"Cǔcǔ 'dàyɨ e'dá alúzà 'dɨ́nɨ," egá 'ɨ́mà ásíá. Se 'ɨ vʉ́tivʉ́ti rʉ́ were ecózʉ́ mbʉzʉ́ 'bùá 'dálé cotí benɨ̀.
Cǔcǔ ndê yɨ dè yɨnɨ́ 'bùá 'dálé amba amba. Òbólókó e'dé ngʉ́kʉ́ drìá dèngà pó'dɨ́ ca cǔcǔ 'dàyɨ vʉ́ 'dálé kʉ.
Òbólókó engárá, se 'ɨ́ vɨ́lé 'dálé aga dɨ́ té òkò rɨ̀ rá. Sâ 'dàsɨ̀ otʉ́ dɨ́ 'ɨ mbuzʉ́ uru aga té òkò rɨ̀ rá. Mbu 'bùá té 'yezʉ́ cazʉ́ cǔcǔ vʉ́ càca rʉ́ te e'dé dɨ́ ngʉ́kʉ́ drìá òkpósì aga té òkò rɨ̀ rá.
Òbólókó engárá se dɨ́ 'ɨ rè aga té òkò 'dɨ̀yɨ drɨ́á rá. Sâ 'dà mà alɨ́á otʉ́ dɨ́ 'ɨ mbuzʉ́ uru agará. Ca dɨ́ cǔcǔ vʉ́ ɨ̀nyɨ́á 'dǎ ògògò te e'dé ngʉ́kʉ́ drìá àzó àzó sɨ̀ aga àzɨ́ 'dɨ̀yɨ drɨ́á rá. Ò'bɨ̀ mbú dɨ́ká dɨ́ká te ecónɨ́ cá cǔcǔ vʉ́ 'dálé kʉ Rɨ e'dé dɨ́ká dɨ́ká kpere èrɨ mà ngʉ́kʉ́ nɨ́ ecárɨá bɨ́lé rʉ.
Àsìzʉ́ adɨ cǔcǔ rá, ko drì mú 'ɨ́mà gèrì sɨ̀.
Àyɨ̀kò funɨ́ òbólókó nɨ àlʉá nɨ kʉyé. Sò pá ja ti vɨ́lé cǔcǔ ndrèzʉ́ rá egá 'ɨ́mà ásíá "óyé, cǔcǔ 'dàyɨ e'dá vɨ́nɨ àlʉ drazàrʉ́" Ko drì muzʉ́ drìlé. Àbírí ndè dɨ́ erɨ aga drɨ̀ò 'dɨ̀yɨ drɨ́á rá.