'Bá drɨ́á nì èwá yɨ mà òmvʉ èzʉ́ rɨ̀ rá.

Te ndráa drɨ̀ò rɨ̀ sɨ̌, Èwá mà òmvʉ ndráa àlɨ́á kúdù kúdù 'dɨ́nɨ. Èrɨ ndráa e'dá kɨ̀lé milétiniá 'bá 'bà vɨ̀átʉ̀ nɨ lé.

Páalé àlʉ Èwámvá òlúkùlúá be nɨ nga dɨ́ osií rá. Osi zitá be ànyàpá àlʉ àlʉ nɨ́ cɨ́.

Lè e'yó ònǐ, òndere mà drìá àvásɨ̀. "Mɨ́ ombelékò zò èzʉ́ à'dɨ e'yó sɨ̀," èrɨ zí.

Lè e'yó ònǐ óbíríá mà drìá tʉ̀. "Mɨ̂ ó'yʉ́ mà sɨ́ mbɨ́lɨ́ 'dɨ́nɨ à'dɨ e'yó sɨ̀ yǎ?" Èrɨ zi.

Lè e'yó ònǐ ròbɨ́ mà drìá àvásɨ̀. "Mɨ́̂ mile ekarʉ́ à'dɨ 'eyó sɨ̀ yǎ?" èrɨ zi.

Lè e'yó ònǐ Éyíó mà drìá. "àfa Éyíó nɨ́ nyá òndrésɨ̀ rɨ̀ à'dɨnɨ yǎ?"

"Lè mɨ́ mà zi zitá àzɨ́nɨ 'dɨ̀lénɨ díká kʉ!" ándríi nga 'yó èrɨ mà tiá. Ándríi ko drì mú àwókó pɨe.

Te gǎgǎ òndʉ̀á be rɨ̀ nga 'yó, "Mɨ́ mà òbɨ̀ mâ vʉ́ti yí àra mà tiá 'dólé. Mɨ nga mu íyíó yɨ òndrésɨ̀ à'dɨ nya yàrɨ̀ nè rá."

Èwámvá nga dɨ́ Gǎgǎ mà vʉ́ti bɨ̌ cazʉ́ kpere yí àra mà tiá.

Mɨ̀ 'ɨ ozʉ́ mà tálá sɨ̀ àzɨ́nɨ sò pá yí tiá. Ndrè àngʉ̀ yí mà alɨ́á. "Íyíó nɨ ngʉ̀á rô?"

"Ákɨ̀nɨ̀â" óní àzɨ́ yí tiá 'dǎ ògògò nɨ 'yo. "Èè," Èwá mvá omvɨ. "Mɨ́ ecó mánɨ́ nyaká íyíó pɨnɨ́ nyá òndrésɨ̀rɨ̀ ecé rá yǎ?"

"Mɨ́ àvù vǎ mà nga ecé mɨ́drí rá," óní nga 'yó. "Èlè, èlè." ànɨ́ èwámvá mu drìlá àvùzʉ́ èlè, kpere.

Kpálu! Íyíó sʉ Èwámvá mà òmvʉ pɨ́ 'ɨ́mà ágbárágbùá 'dálé. Íyíó nɨ̀ nga mɨ nya nyaká òndrésɨ̀ rɨ̀ rʉ́ áda! Gǎgǎ tre.

Èwámvá emvɨ́ rɨ́ 'ɨ́mà pá òkpórʉ́ vɨ́lé 'dɨ̀yɨ mà drìá rá dɨ́ká esé 'ɨ, esé 'ɨ, esé 'ɨ. Te íyíó bɨ̀ kírí èrɨ mà òmvʉ kíri kíri.

Èwámvá mà òmvʉ se 'ɨ́, se 'ɨ́ se 'ɨ́ kpere. Kpù èrɨ nɨ́ e'dézʉ́ 'ɨ́mà ngúkú drìá.

Àwókó íyíó nɨ́ 'ɨ́ vɨ́lé nyaká òndrésɨ̀ rɨ̀ àvɨ̀zʉ rɨ̀ pɨe, se dɨ́ 'ɨ vɨ́lé yí alíá 'dálé.

Èwámvá ndrè 'ɨ́mà òmvʉ. Ecónɨ́ 'ɨ́mà òmvʉ zò àsì kpere ngʉ̀á yàrɨ̀ ndrě kʉ.

Òmvʉ nɨ zò èzʉ́ fè ecó dɨ́ patí éfɨ́ òtɨ̌ engázʉ́ patí mà àràkàlá lɨ́rɨ́ lɨ́rɨ́ 'dɨ̀yɨ mà síá rá.

Ecó dɨ́ vɨ́nɨ yí òyǎ 'ɨ́mà ruá sâ àngʉ̀ nɨ drizʉ́ dri rɨ̀sɨ̀ rá.

E'dózʉ́ 'dàsɨ̀ kpèrè cúrú'dò èwá drɨ́á yɨ mà òmvʉ dɨ́ èzʉ́ àzɨ́nɨ ecá òròdrîrʉ́ yɨ drí.