Abaaho khaleekho, yabawo sitsuutse, ne nga itsala ili khuusilya.
Yaba sili khukendakendakho mukyewa nga siheetsa byakhulya.
Syatuundubikha kumukuunda kwe kamatsangwaali kamarobe pee!
Syabona kumuyooyo kwe kamatsangwaali katsuungatsuunga khu lusakya lwe murwe.
Syelomela sisyeene siri, "Ako kafaana kaanuukutsile
buulayi."
Syesyeendakho inyuma khafwiti ari, syameeyo siisutile ilaala mu ngaki.
Kamatsangwaali kaaba kaayiwanikha mu ngaki
naabi.
Sitsuutse syehena, ne syekhupa haasi makalama, nga mbakhwoola khu matsangwaali ta.
Sitsutse syenyukha, syesyeendela ilaala inyumakho
khukhwaama isi syanyoowa khuuba. Khuluno syeng'oonang'oona khuusunila ilaala mu ngaki.
Afu, afu eene syooleele ilaala angaki khu matsangwaali, ne syemuula aasi kwe ngoolo.
Syetsemamo luundi na luundi ne nga sesinyala khukhwoola khu matsangwaali ta.
Syelang'anamo khuukwa ni khukhwiinyukha, khukhwoolesa kumukoongo kwasyo kweetsulakho buunuubukhe.
Ibumalilisi, syaabirurakho syekeendela saatsya.
Sitsuutse syaaba sikhalafu naabi. Syeemikha syesyebukha inyuma syaloleelela kamatsangwaali tsana luundi syambaasa siri, "Ne kamatsangwaali keene kafwaana kamalulu ndi!"
Syesiindikhilisa syaatsya. Itsala yaba yasiliiliile ilaala khufuura mataayi.