Khayanga o be a dula ka lethabo le batswadi ba gagwe. Bona ba ile ba hlokofala ge Khayanga a nale mengwaga ye lesome.

Khayanga o ile a ya go dula le koko Rosa. Koko Rosa e be ele motho wa go loka, wa lerato, efela o be a tšofetše kudu ebile a hloko sa gagwe.

Khayanga o be a fela a etela mabitleng a batswadi ba gagwe. Ge a le fao, o be a ba botša ka tshotlego yeo a phelago go yona.

Ka tšatši le lengwe o rile a le gona fao mabitleng, a amogela mpho. E be ele nkgo ye botsana yeo e tšweletšego gona mabitleng ao a batswadi ba gagwe.

Nkgo ya thoma go opela košana ye botsana yao kgothatša. Khayanga o ile a lemoga gore lentšu leo a le kwago, ke la mohu mmagwe. Košana e be ere:

Khayanga, ee, Khayanga! Ngwana wa rena a morategi! Ga wa lahlega morategi! Tšea nkgo ye, morategi! Oe rwale gohle mo o yago, morategi! E tla go homotša, morategi!

Khayanga o be a robala le nkgo gape a e rwala gohle mo a yago. Ka go dira bjalo, o ile a kwa lerato le tšhireletšo ya batswadi ba gagwe.

Ka tšatši le lengwe, gwa direga masetlapelo. Nkgo e ile ya thubega ge Khayanga a ile go kga meetse kua nokeng. Pelo ya gagwe e ile ya kwa bohloko kudu.

Khayanga o ile a rwala dikgapetlana tšeo tša nkgo ka matsogwaneng gomme a thoma go opela:

Mme le Tate, Lea bona nkgo e thubegile. Nkgo yeo le mphilego. Naa ke dire eng, Mme le Tate? Nthušeng le mpontšheng seka hle. Gore le sa nale nna.

Khayanga o ile a kwa lentšu la mmagwe le re, "Ngwanaka, topa dikgapetla tšeo di šetšego. Ekga meetse ka tšona gomme o hlape maoto." "Ge o feditše go hlapa, o tswalele mahlo." Khayanga o ile a dira bjalo gomme ka pelapela, nkgo yela ya boela ya loka gape.

Khayanga o ile a phela a rwele nkgo gape gohle mo a yaga. Mo a fetago, batho ba botšišana bare, "Naa ke nkgo ye bjang ye?" Ka thušo ya nkgo yeo, Khayanga o ile a hwetša tšohle tšeo a di hlokago.

Ka nkgo yeo, Khayanga o be a tseba gore batswadi ba gagwe ba nale yena gohle mo a lego. Ga go se sempe seo se ka diragalago.