Khayanga o be a dula le batswadi ba gagwe. Lapa leo le be le phela ka lethabo le lerato. Batswadi ba Khayanga ba ile ba hlokofala ge Khayanga a nale mengwaga ye lesome.
Khayanga o ile a ya go dula le koko wa gagwe, Rosa. Koko Rosa o be a lokile e bile a rata Khayanga, efela o be a godile kudu ebile a hlaka.
Khayanga o be a fela a etela mabitla a batswadi ba gagwe gomme a ba botša ka mohlako wa gagwe.
Ka tšatši le lengwe o rile a le gona kua mabitleng, nkgo ye botsana ya tšwelela mo mabitleng ao a batswadi ba gagwe!
Nkgo yeo ya thoma go opela košana ye bosana yao gomotša. Khayanga o ile a kwa gore lentšu leo le opelago ke la mohu mmagwe. Košana ya re;.
Khayanga, ee, Khayanga! Ngwana wa rena wa morategi! Gao tee, morategi! Tšea nkgo ye, morategi! Oe rwale gohle mo o yago, morategi! O tle o gomotšege, morategi!
Khayanga o ile a rwala nkgo gohle mo a yago. A robala le yona, a sepela le yona. Nkgo ya mo thuša go kwa lerato le hlokomelo ya batswadi ba gagwe.
Ka tšatši le lengwe, Khayanga o rile a ya go kga meetse nokeng ka nkgo ya gagwe, ya wa ya thubega! Pelo ya Khayanga le yona ya thubega ka wona motsotso oo.
Khayanga a topa dikgapetlana tša nkgo a di swara ka matsogwana gomme a opela are;.
Mme le Tate, Lea bona nkgo e thubegile. Nkgo yeo le mphileng. Ke direng, Mme le Tate? Nkweleng bohloko le mpontšheng seka le nthuše. Gore le sa nale nna.
Khayanga a kwa lentšu la mmagwe lere; "Ngwana rena, topa dikgapetlana tšeo di šetšego. Ekga meetse ka tšona o hlape maoto. Ge o fetša o tswalele mahlo." Khayanga o ile a dira bjalo gomme ka pelapela nkgo yela ya go thubega ya loka gape!
Khayanga a tšwela pele ka go rwala nkgo ya gagwe gohle mo a yago. Mo a fetago, batho ba botšišana, "Naa ke nkgo ye bjang ye?" Ka thušo ya nkgo yeo ya gagwe, Khayanga a hwetša tšohle tšeo a di nyakago.
Ka thušo yeo ya nkgo, Khayanga a tseba gore batswadi ba gagwe ba mo hlokometše, le gore ga go selo se sebe seo se ka mo diragallago.