Document

Ãlíríkí Ꞌi Ãzíla Drị̃ꞌbị́ Na Kî

Tessa Welch

Wiehan de Jager

Ándrá ídu rĩ sĩ, izonzi na mụ kí ijijá ụ̃wụ̃lé.

Ĩtụ́ ka dó ãcí ru, ị́jọ́ ꞌdĩ sĩ, mụ kí ị̃yị́ agâlé ru wẽlé. Avá kî ãzíla asa kí ị̃yị́ ãzíla wẽ kí ị̃yị́.

Aru kí ị̃tụ̂ ukó rá. Afụ kí ru gõlé vúlé tọ̃rọ́mẹ́ gâlé.

Kí mụ calé ãni rú lị́cọ́ tị gá, Ãlíríkí ꞌbã ru drị́ ĩꞌdi imbe gá. Ịsụ́ ãvĩ ĩꞌdi ꞌbã ŋálî ꞌbã ị́jọ́ rá. "Jọ ꞌbárĩ ĩmi agụ ma vúlêlé fô!" ꞌBã mãmálá wọ̃rị́ka ꞌba rụ́. Wó wọ̃rị́ka jọ kí sáwã ukó rá.

Ị́jọ́ ꞌdĩ sĩ, Ãlíríkí gõ dó ị̃yị́ agâlé áꞌdụ̂sî. Ịsụ́ ĩꞌdi ꞌbã ŋálî rá ãzíla afụ ru lị́cọ́ gá. Wó ãvĩ ãngũ ị́nị́ sĩ rá.

Ĩꞌdi ꞌbã adru agá rárá ru ndre ãcí iꞌdá jó ãzí agá. Afụ ru ala gâlé ãzíla pã kẽjịtị.

Drị̃ la iza ru, ũcógó nzị̃ kẽjí tị, jọ, "Ílẽ ãꞌdu?" Ãlíríkí jọ, "Má ãvĩ rá, álẽ ãngũ sĩ úꞌdú kojó." Ũcógó jọ, "Mí afí já gá jõku ma ími ci rá!" Ị́jọ́ ꞌdĩ sĩ, Ãlíríkí fi jó agâlé.

Ũcógó jọ, "Mí aꞌdí mání íná!" Umvi, "Wó ídu má áꞌdí jõ drĩ ũcógó ní íná ku ꞌdĩ." Ũcógó jọ, "Mí áꞌdí íná jõku ma ími ci rá." Ị́jọ́ ꞌdĩ sĩ, Ãlíríkí aꞌdí íná ũcógó nî.

Ũcógó jọ, "Mí idé mání gbọ́lọ́!" Ãlíríkí umvi, "Má idé jõ drĩ gbọ́lọ́ ũcógó ní ídu ku." Ũcógó jọ, "Mí idé gbọ́lộ ꞌi jõku ma ími cí rá!" Ị́jọ́ ꞌdĩ sĩ, Ãlíríkí idé gbọ́lộ rá.

Ụ́ꞌdụ́ pírí ĩꞌdi íná aꞌdí ãzíla ãngũ we ãzíla ãkójó kí ũjĩ ũcógó nî. Ụ́ꞌdụ́ ãlu Ũcógó jọ, "Ãlíríkí, ãndrũ ma mụ mâ wọ̃rị́ka kí undrê trũ, íwe jó ꞌbã ꞌa, mí aꞌdí íná ãzíla mí ũjĩ mâ ãkójó kí ꞌdĩ sĩ má ãgõ drĩ ku."

Ũcógó la mụ mụlé ꞌbo, Ãlíríkí anzé drị̃ꞌbị́ ífí kí na angájó ĩꞌdi drị̃kã gá gbõrú. ꞌBã ãlu rĩ gbọ́lọ́ ị̃ndụ́, ãlu rĩ kẹ̃jị́tị ũngúkú gá, ãzí ãlu rĩ kõróŋá agá. Cẹ̃ dó ụ́ngụ́lẹ́ sĩ ũkpó sĩ mbẽlẽ-mbẽlẽ lị́cọ́ gâlé ĩꞌdiní icólé rá rĩ áni.

Ũcógó la mụ ãgõlé ꞌbó, ndrụ̃ Ãlíríkí ꞌi úzáŋâ trũ, "Ãlíríkí, mi íngõlé yã?" Drị̃ꞌbị́ drị̃drị̃ rĩ jọ, "Ma gbọ́lọ́ ị̃ndụ́ ꞌdõ." Ị̃rị̃ rĩ jọ, "Ma kẹ̃jị́tị ũngúkú gá ꞌdõ." Na rĩ jọ, "Ma kõróŋá agá ꞌdõ."

Ũcógó nị̃ dó rá Ãlíríkí ulé dó ꞌi ꞌbo. Cẹ̃ dó ụ́ngụ́lẹ́ sĩ ãzíla cẹ̃ dó gẹ̃rị̃ gá sĩ kpere tọ̃rọ́mẹ́ gâlé. Wó Ãlíríkí ádrị́pịká kí drị̃ la tẽ agá kẹ̃lị́ use la kí sĩ. Ũcógó uja ru apálé ụ́ngụ́ sĩ ãzíla cẹ̃ dó rá úndre dó sĩ ĩꞌdi ị̃dị́ ku.

You are free to download, copy, translate or adapt this story and use the illustrations as long as you attribute in the following way:

Ãlíríkí Ꞌi Ãzíla Drị̃ꞌbị́ Na Kî

Author - Tessa Welch
Translation - Barnabas Delu
Illustration - Wiehan de Jager
Language - Aringati
Level - Longer paragraphs