Kolo na nyakhoko bukhali uxamwali bwawo bwakuti ponda ndipondembo. Iwo akhambasendzeka pabodzi na kumbadyera pabodzi. Ndipo bzinthu bzentse akhambacita pabodzi.
Tsono ntsiku inango nyakhoko adaduwala kwene-kwene kwa kuti penu-penu. Pomwe iye adawona kuti matenda yale yali kufika pakuipa, adayenda kwa nyabezi kukawombeza, ndipo nyabezi ule adamuuza kuti: "Wona kuti iwepo ulimbe, bzinfunika kuti iwepo udye nyama ya kolo."
Pomwe adabva bzimwebzo, nyakhoko adakhala na ntsisi. Tsono pakhalibe muti winango omwe angadaphata kuti iye alimbe acisaya kudya xamwali wace Koloyo.
Pomwe Kolo adayenda kukawona xamwali wace Nyakhokoyo, iye adamubereka kumbuyo aciyenda naye pakati panyandza.
Pomwe akhali pakati panyandza pale nyakhoko adauza Kolo kuti: "Nyabezi wandiuza ine-pano kuti ndirimbe bzinfunika kuti ndidye iwepo xamwaliwe."
Ndipo kolo adatawira kuti: "Ne xamwali, leka kudya ine-pano, thangwe ndine m'ng'ono, dikhira ndikakucemerere yavu wangu, nakuti iye ni mkulu kuposa ine-pano. Omweyo ndiye ungadye ucikhuta."
Ndipo Nyakhoko adabvundza kuti: "Apa yavu wakoyo ali kuponi?" Ndipo Kolo adatawira kuti: "Ali m'muti ule-ule omwe uli pantsuwa ule." Ndipo nyakhoko adamuuza kuti: "Ndoko ndipo ukamutenge kuti ndidzadye ndidzakhute."
Kolo adamoga aciyenda m'muti mule acikakhaliratu. Ndipo alibe kubwerera pomwe. Nyakhoko adadikhira, kudikhira, kudikhira. Ndipo adawona kolo ziiii. Ndipo budamalira uxamwali bwawobo.