Lelapa la gaabo Moipone le ne le tletse boitumelo. Moipone o ne a nna le batsadi ba gagwe. Ba ne ba tlhokafala fa Moipone a le dingwaga di le lesome.

Mosadimogolo Rosa o ne a tsaya Moipone go nna le ene. O ne a siametse Moipone, fela o ne a tsofetse thata ebile e le modidi.

Moipone o ne rata go etela mabitla a batsadi ba gagwe. O ne a lela mme a ba bolelela tshotlego ya gagwe.

Ka letsatsi lengwe fa a ba etetse, o ne a amogela mpho. Sego se se ntle se ne sa tlhagelela go tswa mo mabitleng a batsadi ba gagwe.

Sego se ne sa opela pina e e monate e e namatsang e re Moipone we, Moipone! Ngwana wa rona o o rategang! Ga o khutsana, moratiwa! Tsaya sego se, moratiwa! Se rwale gongwe le gongwe ko o yang, moratiwa! A se go babatse, moratiwa! Moipone o ile a lemoga lentswe la ga moswi mmagwe.

Moipone o ne a tsamaya kasego sa gangwe gongwe le gongwe. Se ne se mo sireletsa fa a ya nokeng go ya go ga metsi. Ka sego se, Moipone o ne a utlwa e kete batsadi ba gagwe ba sa tshela.

Ka letsatsi lengwe ga diragala matlhotlhapelo ka sego sa ga Moipone Se ile sa thubega fa Moipone a ga metsi kwa nokeng. Pelo ya ga Moipone le yone e ne ya thubega ka kutlobotlhoko.

Moipone o ile a tshwara manathwana a sego sa gagwe mme a opela: Mme le rre, Bonang sego se thubegile. Sego se lo mphileng sone. Ke dire eng batsadi ba me? A molemo wa lona o mpontsheng sengwe Gore lo santse lo na le nna.

Moipone o ile a utlwa lentswe la ga mmagwe le re: Ngwana wa rona, Sela manathwana a a setseng. Gelela metsi ka ona mme o tlhape maoto a gago. Fa o fetsa go tlhapa, o tswale matlho. Moipone o ile a dumela mme ka ponyo ya leitlho, sego se se thubegileng se ile sa siama gape.

Moipone o ile a tswelela go tsamaya gotlhe ka sego sa gagwe. Kwa a neng a feta teng, batho ba ne ba sebaseba ba re, "Ke sego sa mofuta ofe se?" Ka sego se sa gagwe, Moipone o ne a amogela tshotlhe tse a di tlhokang.

Ka sego se, Moipone o ne a itse gore batsadi ba gagwe ba mo sireleditse. Go ne go sena bosula bo bo neng bo ka mo diragalela.