Awak nî abala iko ôrrîahata hoŋ Omênnê.

Oyyu arrîaha hôhôî.

Ellê îfahînî ôbô jihôhôî ôbô amaji, êtîk hôhôî ꞌdaŋ.

Tô ôbô nôlôŋ, îfak anî hahanyi hoŋ îdûkan înyaŋuniere alliŋ iko êyalî.

Attatî hôhôî ifuatan iko Omênnê.

Hinyia efuo hôhôî, êttê hôhôî igonyuna ôrrîahat hôhôî abalaî akura.

"Aha! Akura!" Ajio nî.

Awak buo fê nî îbala.

Ajio nî jio Omênnê jio, "Efî êllê iruhi isi jio ijiara êbala iko isi. Awak atua hoŋ abala kura bêbê."

Itarraŋak Omênnê jio, "Efuo îdûkan dô, attatî buo ifuanna îbala."

Buo nî êttê îtarraŋana, "Ebala dô! Obeŋ hahanyi hoŋ ôlô îŋatana hôhôî ecohuno."

Erraŋanio hôhôî abala iko ôrrîahat hôhôî hulia. Arra nyia nî îtîgîrî.

Araî nyia alala îtîgîrî amoruoi.

Ehûm nyia nî îrra bêbê înêfûniere akura.

Obeŋi nyia ôrrîahat hoŋ hulia ôrûmanî ômûk êtîgîrîta.

Ebala hôhôî many îfût êbalît kura asûlûŋayô.

Anîa, attatî hôhôî ifuatan îdûkan. Alitohini nyia anyahuo hahanyi hoŋ hûa! Ettê nî itterio ayyo.

Irîŋ Omênnê nanî, "Heyyo. Iwak duo iyye abala dô."

Ecaharû hôhôî îhaŋ obeg alliŋ iko êyalî.

Ibôtî nyia ahûattêk hôhôî bêbê buo fê hôhôî ehawwa.

Hinyia êfany hôhôî îhaŋ, Ilôŋôjîta nyia hahanyi hoŋ bêbê.

Ittêr nyia inyi efiyo hôhôî jio, "Many tô noduo nyia ꞌdaŋ îwanata îtaî ajia?"

Eramak nyia hôhôî jihonyi ahôdê-hôdê hîram.

Ettê inyi îsar jio, "Henyiahata ifuatan îbala alla abeŋi aŋatanî îtaî."

Attatî hôhôî ifuatan îtaŋiyo alafahî.

Gaa diyya, êttê hôhôî ifuatan ihuyoro.