Aabawo khaalekho, bakhaana bataru baatsya khureenya tsiikhu.

Antsye aaba abiilile naabi, kila batsya i luutsi khuusuba. Baryo baasuba nga benyaha, nga behanyakila kameetsi.

Baatsya khukhebulila nga antsye abukabukana. Beeyunakho khuukobolayo ingo.

Nga bali aambi khukhwoola ingo, Namutosi weyabaaba mu milo mweewe. Wenyoola nga webiliile kumukufu kweewe. Aryo wekoontselela basheewe ari, "Ni munjeete khukoboleyo." Ne basaale beewe baaloma bari antsye bwelabuule naabi.

Aryo Namutosi waakobolayo iluutsi yenyene. Waanyoola kumukuufu kweewe, kila akyeendaka khaangu khuukobolayo ingo. Ne wakoraana khu lwe shishiilima.

Iburaangisikho waabonayo kumulilo kumulikha nga kwaamila mu ntsu. Waakyendaka khaangu woolayo, waakhoonyaka khu lwiitsi.

Shamwiyaangisa khuubona nga imbwa niyo iyamwiikulilawo lulwiitsi, yaamureeba iri, "Ukana shiina?" Namutosi waakilamo ari, "Naatibile, ari imeentsa shiifwo e khuukona." Imbwa yaamwiilamo iri, "Ingila mukari, noola ta, ikhuluma. Aryo Namutosi wenjila mu ntsu."

Lwanyuma imbwa yaamuloma iri, "Indeekhele biilyo." Namutosi weelamo ari, "Ise mbakhuteekhatsakilakho imbwa biilyo ta. Imbwa yaamuloma iri, "Teekha, noola ta, inakhuluma!" Aryo Namutosi wamaaya waakiteekhela biilyo."

Imbwa yeelakho yaamuloma iri, "Intsalile buulili." Namutosi waaloma ari, "Ne ise nakhwaalatsakilakho imbwa buulili ta." Imbwa nayo yaamurisaka iri, "Yaala buulili, noola ta, inakhuluma." Aryo Namutosi waala buulili.

Buli busheele, Namutosi aateekhatsaka, weeya mu ntsu, luundi wasiingatsakila imbwa. Aabawo lutweela imbwa yaloma Namutosi iri, "Namutosi, shaleelo indi khuutsya khukyeniyilakho basaale baase. Ingana weeye intsu, uteekhe biilyo, usiinge bibiindu byase, nga ishiili khukobola ingo ta."

Lubaluba nga imbwa ilitsiile, Namutosi waakusa butsuune butaru khu murwe kweewe. Khatweela waakhara mu khuriiri, khakhaandi waakhara inyuma we lulwiitsi, ni khakhaandi waakhara mwitaala. Lwanyuma waarandabala tsindimo khuutsya ingo.

Ne imbwa ni yakobola, yaheentsa Namutosi. Yalaanga iri, "Namutosi, uli waheena?" Khatsuune khakhanyoowa kheelamo khari, "Ise indi ano mu khuriiri." Khakhaandi nakho khari, "Ise indi inyuma we lulwiitsi." Khe khataru nakho khari, "Ise indi ano mwiitaala."

Khaangukho, imbwa yaamanya iri Namutosi waakiwomeele. Iryo yaarakho tsindimo yaatima, yaloonda luukyele paka mu shaalo. Ne basaani ba Namutosi baaba nga baakibuliile ni tsisoonyi. Imbwa yashuukha, yenyukhilamo yaatima yeelayo. Ni khukhwoolesa ari sibakibonatsakakho luundi ta.