Ahale hale bugali, ŋaaliŋo abahaana badatu abatiina ohutenya ekwi.

Ni bahena ohutenya ekwi, olw'ebbugumu batiina mu lwabi ohwebbomba. Batagiha ohwebbomba n'ohugudula ni baswanyusaniaho amaaji.

Baja ohuhebulira obwire ni bubitire. Nga baŋiitaho ohwagama engo.

Ni baali ni banatere ohwola engo, nga Nanjoosi geyabaaba mu mamiro. Ng'afania ati gaali gebiriyeyo embira jije! Ng'aloma abahye ati, "Bahyange muuje hwagameyo keje embira jange!" Aye abameeri babe nga baloma baati "Obwire bubitiriiye bugali."

Ng'aŋo Nanjoosi gaagamayo hu lwabi yekani. Gageene embira jije era geŋiitaho ohwagama engo coka gaagota engira mu hiirema.

Ni gaali nagenda galengera enjase ni yiŋwera mu hatiira. Gaŋiitaho ohutiina eyaali enjase era ni goola ng'akokona hu lwigi.

Ehyamweŋunjisa embwa nj'eyegulaŋo olwigi. Era nga yimubuusa yiiti, "Wenda hiina?" Nga Nanjoosi agobolamo ati, "Ngotire era nenda ehifo aŋohuŋenyuha." Ng'embwa yimuloma yiiti, "Yingira mangu ni kiri huhuluma!" Nga Nanjoosi gengira.

Ng'aŋo embwa yiroma yiiti, "Piiyire!" Nga Nanjoosi ayiroma ati, "Ese sipiiyarangaho mbwa," Ng'embwa yimuloma yiiti, "Nyiiya, nyiiya ni kiri huhuluma!" Ng'aŋo Nanjoosi anyiiyira embwa ebiryo.

Ng'embwa yiloma Nanjoosi yiiti, "Njalire obuliri!" Nga Nanjoosi ayiroma ati, "Ese sinalirangaho mbwa obuliri." Ng'embwa yimuloma yiiti, "Yaala, yaala obuliri, ni kiri huhuluma." Nga Nanjoosi gaala obuliri.

Hiisi ludaalo Nanjoosi gabanga n'ohunyiira n'ohusagula, n'ohwohesa embwa. Aye lulala embwa yamuloma yiiti, "Nanjoosi, olwalero nja huhyalira abameeri bange. Sagula enyumba, onyiiye ebiryo, era wunjohese ni tagaluha."

Amangu dala embwa ni yahatiina, Nanjoosi gahunyula obufiiri budatu ohuŋwa hu mutwe gugwe. Ng'ata halala mu makuliiti, ng'ata ahandi egongo w'olwigi, n'ahandi mu hiraalo. Ng'aŋo ko aŋwanjuha embiro ng'olu aŋanga gaagama engo.

Embwa ni yagaluha yendula Nanjoosi ni yibbuhulya yiiti, "Najoosi, oli ŋeena?" Ng'ahafiiri ahaali mu makuliiti haloma haati, "Ndi ŋano, ŋano mu makuliiti." Ng'ahafiiri ahandi hoosi haloma haati, "Ndi ŋano, ŋano emugutu w'olwigi." Nga n'ahandi hoosi haloma haati, "Ndi ŋano, ŋano mu hiraalo."

Ng'aŋo embwa yimanya yiiti Nanjoosi aponyohire. Nga yiduluma yirondaho. Aye yageene ababoojo ba Nanjoosi ni bayeteegire n'agasimbo ageene agabba! Embwa ni yababona nga yicuuhaŋo yiduluma yagamayo era ohuŋwa hwolwo sebonehanga nundi.