Ndenno gerogal bee saafoore e ɗi coobiri soosey. E ɗi njooɗi nder jam bee colli luttuɗi fuu.

Ammaa walaa fiirooru nder maaji.

Sey nyalnde feere weelo waɗi e leydi ndin. Doole saafoore wanca daayiiɗum ngam heɓa ko nyaamata.

Nde nde warti, nde somi ɓuri semmbe. Sey saafoore wi'i, "Haani mi heɓta no mi wancirta bee koyɗum, bannda iri saɗirma ɗu'um."

Fini, gerogal siwtake jam, dabare wonnde waraningal. Ngal fuɗɗi subtugo liiliiji januɗi diga colli fuu.

Gerogal wi'i, "Nyootenɗi dow biyeeli meeɗen, foti ɗum ɗustana'en mbidu wancugo."

Saafoore tan marno baatal nder wuro ngon, sey nde fuɗɗi nyootugo. Nde nyootani hoore maare biyeeli boɗɗi soosey, sey nde fiiri dow gerogal.

Gerogal wuƴi baatal, ammaa yeeso seɗɗa, ngal somi nyootugo. Sey ngal resi baatal dow danki, ngal nasti kicin ngam defango ɓikkon maagal.

Ammaa colli luttuɗi ngi'i no saafoore fiiriri dow koo ɗume. Sey ɗi ƴami gerogal baatal ngam nyootugo biyeeli maaji kannji fuu.

Yeeso seɗɗa colli keewi asama, e ɗi piira koo toye.

Nde sonndu sakitiindu wartiri baatal, gerogal walaa ɗon. Sey ɓikkon maagal njaɓi baatal, kon ngaɗi ka fijirgongal.

Nde kon comi fijirde, kon acci baatal nder njaareendi.

Nyalowmaare nden sey saafoore warti jahaangal, ƴami baatal ngam wo''ingo biyeeli maagal lostiiɗi.

Gerogal sey raari dow danki, raari nder kicin, raari yaasi suudu ammaa ngal yi'aayi baatal.

Gerogal tori saafoore, "Useni hokkam nyalnde go'o, nden a wo''inay biyeeli maaɗa, piira fahin, ndaaroya nyamdu."

Saafoore wi'i, "Nyalnde go'o kap. Taa yi'aayi baatal ngal, a yoɓirayyam ɓinngel maaɗa gootel."

Fini, nde saafoore so''oyi, nde tawi gerogal e wera njaareendi ammaa baatal yi'aaka. Sey saafoore fiiri maja, wifti ɓinngel gerogal gootel, dillidi.

Daga ɗon, nde saafoore wanngani gerogal fuu, sey tawa e ngal wera njaareendi, e ngal ɗaɓɓita baatal.

Warti, no mbeelu biyeeli saafoore njanirta e leydi, gerogal sey waggina ɓikkon maagal, "Cottee e njayri, mburtee babal njaareendi!"

Sey kon njaaboo, "Naa' min yinnaaɓe, min ndoggay."