Ko faɓɓuno ɓiɓɓe rewɓe tato njahiino teenol.

Gulɗum waɗi, sey ɓe njahi maayo ngam yinaago.

Ɓe nginii, ɓe piji, ɓe mbiccindiri ndiyam, ɓe nani belɗum.

Sey ɓe killitii, asee hiiri! Sey ɓe njawɗani hootugo.

Nde ɓe ɓaddi wuro, Juleyka sey meemi daande muuɗum:

Mo nani mo yejjitii koɗol maako!

Mo tori sooɓiraaɓe maako, "Useni ɗofteeyam, co''ooɗen maayo!" Kamɓe sey ɓe mbi'imo ɗum jenngii waanee.

Juleyka sey so''ii maayo feere maako.

Mo heɓti koɗol maako, sey mo yawɗani wuro, ammaa mo majji ngam nyiɓre waɗii.

Juleyka sey teyni njayri to suudu.

Mo yaawi yottaagondu, sey mo silminii.

Mo hayɗini nde ɓoosaaru maɓɓiti dammugal.

Ndu ƴamimo, "Ko ngiɗɗa?"

Sey Juleyka wi'i, "Mi majju, e mi ɗaɓɓita to mi waalata."

Sey ɓoosaaru wiʼimo, "Nastu, sinaanon boo mi ŋatuma!" Sey Juleyka nasti.

Ɓoosaaru wi'i, "Defanam!"

Sey Juleyka jaabi, "Mi meeɗaayi defango ɓoosaaru."

Sey ndu wiʼimo, "Defu, sinaanon boo mi ŋatuma!"

Sey Juleyka defanindu nyamndu seɗɗa.

Ɓoosaaru wi'i, "We''itanam leeso!"

Sey Juleyka jaabi, "Mi meeɗaayi we''itango ɓoosaaru."

Sey ndu wi'imo, "We''itanam sinaanon boo mi ŋatuma!" sey Juleyka we''itanindu leeso.

Nde weeti fuu Juleyka defanandu, wuwanandu, layɓanandu.

Sey nyalnde feere ɓoosaaru wi'i, "Juleyka, hannde mi yahay sumpoyaago lenyol am. Wuuwu suudu, defu nyamndu nden lonnanam ko mi warta."

No ɓoosaaru dilliri Juleyka itti laasi tati e hoore muuɗum.

Mo resi laasol gootol ley leeso, mo resi gootol gaɗa maɓɓoode dammugal bee gootol yaasi suudu.

Nden mo itti pargal, mo doggi semmbee, mo hooti.

Nde ɓoosaaru ndun warti, ndu ɗaɓɓiti Juleyka.

Ndu noddi, "Juleyka, toye ma?"

Laasol artungol wi''i, "Rayyam ley leeso."

Laasol ɗiɗaɓol wi'i, "Rayyam gaɗa maɓɓoode dammugal."

Laasol tataɓol wi'i, "Rayyam yaasi suudu."

Ɓoosaaru heɓtii Juleyka ƴoyriindu.

Ndu doggi, ndu doggi haa ndu yottii seele.

Ammaa sakiraaɓe Juleyka worɓe e ndeenunoondu bee cabbi.

Ɓoosaaru ndun sey wayliti doggi, ndu meetaayi yi'eego fahin.