Mbukaaniinga! Kale-kale, boonse banyama taakwe nobakajisi maulu.

Bakali kukalaba biya.

Bantu balikke mbobakajisi maulu mwami Maguru ngaakabapa.

Bumwi buzuba mwami Maguru wakayeeya kupa maulu kubanyama boonse. Wakeenda kuzinguluka munzi kayaabwaambilizya kubelesya ntolompita.

Wakali kuyanda kuti boonse banyama kabeenda.

Banyama bakkomana kapati nobakomvwa kuti bayakupegwa maulu. Aumwi munyama wakayanda kubaa maulu kutegwa keenda akulunduka.

Banyama bakaimba akukwisula micila. Bamwi bakavwupaula mababa abo.

Bakabungana muswaangano kwaambaula mbocakali ciyumu kukalaba. Bulongo bwakalil kubacubbula mwida.

Maulu ayakubagwasya kuti kabaimikila abubona kulaale mbuli bacita bantu.

Nobwakasika buzuba, banyama bakakalaba kuya kuŋanda yamwami Maguru kuti bakabweze maulu.

Ndyabuluba, basyuumbwa, bazovwu, basulwe, baciwena kubikkilizya abayumi bakandandama akulindila kuti bapegwe maulu.

Munyana omwe-omwe wakapegwa maulu one.

Ono balo bayuni bakapegwa maulu obilo-obilo.

Banyama bakaboneka bwaandeene. Bamwi bakazyana mulutangalo.

Bambi bakabaa buyumu-yumu aboobo bakali kuwa nobakali kweenda.

Banyama bakeenda kabayaabuzinguluka munzi kunyomenezya bantu.

Boonse banyama bakati, "Kunyina notuya kukalaba alimwi."

Munyama wakali wamamanino mumundando lyakali Jongola. Mwami Maguru wakabuzya Jongola kati, "Sena kuli bambi banyama bakutobela?"

"Peepe. Ndili wamamanino," Jongola lyakavwiila.

Maguru wakayeeya akwaamba kati, "Kuti naa kunyina bambi, ino ndilacita buti amaulu aaya acaala?"

Mpoona Maguru wakapa Jongola maulu oonse akaceede.

Jongola lyakakkomana nkaambo lyakabaa maulu manji.

"Ndinikweendesya kwiinda boonse banyama," oobu mbolyakayeeya Jongola.

Mbolyakazwida biyo Jongola, Nzoka yakaboola kuŋanda ya Maguru.

"Amundipe maulu andime mwami," Nzoka yakalomba.

"Ndaapa kale maulu oonse. Ino walikuli yawe?" oobu mbwaakabuzya mwami Maguru.

"Ndoonenena," Nzoka yakavwiila.

Maguru wakayandaula muŋanda yakwe kuti naa kwakalisyeede maulu.

Ono kunyina angaakaajana.

Maguru wakazwa anze akuti, "Cabija onzoka. Kunyina maulu asyeede." Inzoka yakacuta buyo kuya kung'anda kainyina amaulu.

Kuzwa buzuba oobo, Nzoka tayoonesyi. Lyoonse yalo ilindila ciindi cabili cakupegwa maulu.