Izuba lyakabala kapati cilimo eeco.

Mucisaka mwakayuma.

Kanyenyeene tiikakajisi meenda kwamazuba manji.

"Ndiyanda dosyi lyameenda nokuba kuti lyandilokela biyo kupepe," kakaamba Kanyenyeene.

Ono amume buyo wakaliyumide.

"Kuti naa nsejisi meenda ndilafwa," kakoompolola Kanyenyeene.

"Ndeelede kuya kumulonga ngondakamvwa."

"Mulonga wazula alimwi ulaa nguzu. Ulakutola," oobu mbwaakakacenjezya lukobo.

Pele Kanyenyeene kakalaa nyota kapati. "Ndilafwa naa nditanywi meenda."

Aboobo kakajokela kuyandaula mulonga.

Kakainda mumbwizu bwakazambene atalaa milabi yakayumide.

Kakeenda limwi kakamvwa meenda asansa. Ooyu wakali mulonga.

Kakamvwa mayuwe aameenda.

Kanyenyeene kakamena ngudyu yameenda atontola.

Kakakkomara kapati cakuti kunyina nokakabona yuwe nkolyaali kuboola.

Kanyenyeene kakasola kujatilila kubwizu bwakali kwiimpauka, kabwiinda awo mpokakabede.

Pele kakapyeelwa ameenda.

"Amundigwasye! Amundigwasye!" Kanyenyeene kakaita.

"Fwambaana, tanta awa," Nziba yakaamba kaijisi katabi kumulomo.

"Ndilakkala aano kutegwa ndilumbe Nziba." Kanyenyeene kakayeeya.

"Ndilalindila kusikila iboole kuzyikunywa meenda."

Bumwi buzuba kakalindila Kanyenyeene, kwakaboola basankwa bobilo kumulonga.

Basankwa aaba bakajisi malekani.

"Kuli nziba mpati ituba iboola kunywa meenda. Njotutiilalile masiku aasunu," wakaamba musankwa umwi.

"Tandikoolekela basankwa aaba kwiijaya Nziba," kakayeeya Kanyenyeene.

"Ono ndaceesya. Ino ndacita buti?"

Ndilyona biyo, Nziba iituba yakaselemuka ansi kuzwa mucisamu kutegwa inywe meenda.

Kanyenyeene kakayeeya cakucita.

Kakasotokela acituta camusankwa omwe.

Kanyenyeene kakamuluma canguzu musankwa ooyu.

Ooyu musankwa wakasotoka.

Mpoona wakoomba kati, "Accuu!"

Niyakamvwa koompolola, Nziba yakanyongana mpoona yakauluka.

Oobu mboyakafwutuka.

Mbombuboobo Kanyenyene mbokaalumba Nziba akukafwutula nkoyakakafwula.