Lintu
baanina Simbegwire baafwile, ali uwasakamana sana. Bawishi baaliesha namaka
ukumona ukuti Simbegwire ali umutende. Panono panono, baasambilile ukuba
abatemwa nakabili, ukwabula baanina Simbegwire. Cila lucelo baaleikala na
ukulanda pa bushiku bwakuntanshi. Cila cungulo baalepekanya icakulya ca
cungulo capamo. Panuma ya kusuka ifya kuulilapo, bawishi Simbegwire baaleafwa
umwana imilimo ya kusukulu.

Ubushiku  bumo, bawishi Simbegwire baaishile pa
n’ganda munshita yabushiku ukucila inshiku sha kunuma. “ulikwisa we mwana
wandi”? baalitile. Simbegwire abutukile kuli bawishi. Aliminine lintu amwene
ukuti baawishi bekatilile umwanakashi pakuboko. “ndefwaya iwe wishibane no
muntu umo umusuma, we mwana wandi. Uyu ni Anita,” baalandile mu kumwentula.

“shani
Simbegwire, bawiso baanjebele ifingi pali iwe,”Anita aalandile. Koma
Simbegwire taamwentwile nangu ukuposha uyu mwanakashi mu minwe. Bawishi
Simbegwire baali abatemwa na insansa. Baalandile efyo bonse batatu bangekala
pamo, na efyo imikalile yabo i ngaba isuma. “we mwana wandi, ndesubila
walasumina Anita ukuba nga banoko,”baalandile.

Ubwikashi
bwa kwa Simbegwire bwacinjishe. Taakwete inshita yakuba nabawishi mu lucelo.
Anita aalemupela incito sha pa n’ganda ishingi icalengele ukuti alefilwa uku
kwata inshita ne milimo ya kusukulu mu cungulo neco aleenaka sana. Aile
mukusendama panuma ya cakulya ca mu cungulo. Ubusumino bwakwe, bwali li
langishi lya bulangeti bamupele banina. Bawishi Simegwire calemoneka kwati
tabaishibe kuti umwana wabo taali uwansansa.

Panuma
fye ya myeshi inono, bawishi Simbegwire balaile pa n’ganda ukuti ba
balefumapo panshita inono.”mfwile ukuya kuncito,”baatile. Koma ninjishiba
ukuti mwakulaikala fye bwino. 
Simbegwire aponya necinso panshi, koma bawishi taabaishibe. Anita
talandile nelyo cimo. Naena taatemenwe iyo.

Ifintu
kuli Simbegwire fyacilamo. Nga tapwishishe incito isha mu n’ganda, nangu
ngailishanya, Anita aleemubola. Nga nipa cakulya ca cungulo, Anita aleelya
ukucila ukushila Simbegwire utwakulya utunono. Cila bushiku nga bwaila,
aleelila uku ninshi nafukatila no bulangeti bwa baanina.

Ubushiku
bumo ulucelo, Simbegwire alicelwa ukubuuka. “we mwanakashi wabunan’gani
iwe!”Anita apaatile. Asuunkile Simbegwire ukumufunya pa busanshi. Ubulangeti
bwaiketwe no musomali no ku bulepula mu bili.

Simbegwire
alifulwa sana. Atontonkenye ukubutuka ukufuma pa n’ganda. Aseendele utupimfya
twa bulangeti bwa baanina, ifyakulya afuma na pa n’ganda. Akoonkele umusebo
kwaile bawishi.

Lintu
caishilefika icungulo, aniinine kucimuti icitali mupepi nakamana apanga no
busanshi mu mabula. Cilya talapona mu tulo, aimbile: maama, maama, maama,
mwalinsha ine. Mwalinsha ukwabula ukubwela. Taata tantemwa nakalya. Mayo
nilisa muleisa? Mwalinsha ine.

Ubushiku
bwa konkelepo ulucelo, Simbegwire aimbile ulwimbo nakabili. Lintu banamayo
baaishile mu kucapa ifya ku fwala pa mumana, baumfwile ulwimbo lulefumina ku
cimuti icitali mumano ukuti cali cipuupu caaletensha amabula, awe
bakonkenyepo ne milimo yabo. Koma umo pali bena aumfwile ku lwimbo no
bupilibulo.

Uyu
umwanakashi alooleshe kumulu wa cimuti. Lintu amwene cikashana na utupimfya
twa bulangeti, aliila, “Simbegwire, umwana wa ndume yandi!”  Banamayo bambi baalekele ukucapa na ukwafwa
Simbegwire ukwikila panshi ukufuma ku cimuti. Baanina senge baafukatile
umwipwa no kwesha uku mutalalika.

Baanina
senge Simbegwire baasendele Simbegwire ku n’ganda kumyabo. Baapele Simbegwire
icakulya icakaba panuma, no ku mufimbilikisha pa busanshi no bulangeti bwa
baanina. Bulya bushiku, Simbegwire aliilile lintu talalaala. Koma fyali
filamba fya nsansa. Alishibe ukuti baanina senge balamusunga bwino.

Lintu
bawishi Simbegwire baabwelele ku n’ganda, baasangile ku muputule wakwa
Simbegwire takuli nangu kamo. “ninshi yacitike, Anita?” baipwishe no mutima
uwafina. Anita ekulondola ukuti Simbegwire alibutuka. “naalefwaya alempela
umucinshi”. Alaandile. Koma limbi caali cilamo.” Bawishi Simbegwire baafumine
pa n’ganda no kulola ku mumana. Baapitile mpaka ku mushi waba nkashi yabo
ukuya mu kwipusha nga cakuti baali mumonako Simbegwire.

Simbegwire
aleeangala na bafyala bakwe lintu amwene bawishi pakatalamukila. Aaletina
pali limbi nabakalipa, ici calengele ukuti abutukile mu n’ganda mukubelama.
Koma bawishi baile kuli ena na ukulanda ati “Simbegwire, walisanga banoko
abapwililika. Banoko abakutemwa kabili abakwishiba efyo waba. Nga pali ici,
ine ndi ngo watemwa kabili nalikutemwa. Baalisuminishanya ukuti Simbegwire
akekala nabaanina senge panshita akafwailapo umwine.

Bawishi
bale mutandalila cila bushiku. Mpaka pakulekelesha, baishile na Anita. Aikete
Simbegwire pakuboko. “unjeleleko we mwana, nali luufyanya,”aliilile. Kuti
wansuminisha ukuti njesheko nakabili?” Simbegwire aloleshe bawishi abali ne
cinso ca bulanda. Simbegwire aatampwile panono panono ukulola kuli Anita na
ukubika amaboko yakwe ukushunguluka Anita.

Umulungu
wakonkelepo, Anita aitile Simbegwire muku mutandalila pamo naba fyala bakwe
ukubikapo fye na baanina senge wakwe. Cakulya ninishi ici! Anita apekenye fye
ifya kukulya fya temwa Simbegwire na bonse baipakishe mpaka baikuta. Abaice
balyangele elyo abakalamba balyashike. Simbegwire aumfwile insansa ne
cilumba. Atontonkenye ukuti nombaline, nombaline sana, akabwelela ku n’ganda
mu kwikala nabawishi na baanina bakusangamo.