Gɔr nyǝnǝrɑ̀ tɑrɑm beeŋǝ sibi
sibiʋ sɛɣǝrǝl sʋɣɑ.

Lɑ mɑn gɔrɑ wuɣǝn fii
le nyǝtǝrɣɑ wɑ vǝr
nyɑm kɑ̀ nyu nɛɛ.

Nǝnnɑ kɑ ʋ:
Mɑ yermɑ mɑ vǝrɑ nyɑɑsǝ mɑ nyu, bɑɑ vɑɣʋ gɑɑɣʋ nǝnnɑ mǝ zeenǝnnɑ.

Amɑ lɑ mɑn lɑ koorǝn
mɛrǝm tom kɑ kpɑrŋii.

Lɛɛ nyǝntǝrɣɑ ter nɔ-jɑŋǝrʋŋ kɑ: Kɑ mɑ wɑ vǝr
nyɑm mɑ nyu, mɑ nɑ ku.
Se mɑ demɑ dorɣɑ deŋɑ bɑʋ mɑ wǝmǝr nɛɛ
kɑ nʋŋ.

Lɛɛ cirɣɑ kɑ ben yisɔɣ-jɛnɛŋɑ nɛɛ
kɑ bǝtǝ nyǝntǝrɣɑ kɑ:  Dorɣɑ cǝɣɑ nyɑm nɑ jǝtǝn
bǝ yoo!

Tǝɣɑ, nyɑnyurʋŋ tǝ jerǝm toɣɑrɑ sɔrɔ. Lɛɛ kɑ
ʋ: Kɑ
mɑ tǝ wɑ vǝr nyɑm
mɑ nyu, mɑ
nɑ ku.

Lɛɛ kɑ̀ yisǝrɑ kɑ jǝtǝ dorɣɑ
cǝɣɑ lɑɑɣʋŋ.

Mɔ-kpɑrnǝ ǝn dɑŋ-kpɑrɑi sʋɣɑrɑ kɑ cɛnǝmnɑ.

Hɑr kɑ dɑn kɑ wǝmǝrɑ dorɣɑ cǝɣɑ nyɑm dɑɑmʋŋ.

Kɑ cɛnǝ
nɛɛ lɛɛ kɑ vɑɑr nyɑ-bɑm ɑrɑ jɛnɛɛɛm.

Kɑ leɣʋ
kɑ bɑɣ sɔrɔ,
hɑr lɑʋ cɑɑ kɑ wɑ yɛr kɑ nyɑ-wɔɣǝm be kɑ jornɑ.

Nǝnnɑ kɑ yir
yɑɣǝʋ lɑ sekɑ kɑ vǝrɑ kɑ cɑwǝr mɔ-kpɑrŋʋ kʋ zɑriimǝ kɑ nǝnɣɑ nǝn nɛɛ. Amɑ nyɑm tom denii kɑ.

Lɛɛ kɑ̀ jemǝ
bɑ pǝsǝ kɑ, kɑ yi kɑ: Pǝsǝnɑ mɑ wɑ! 

Jɑŋmɛnɣʋ kɑ pǝnǝn
kɑ bɑwǝrnɑ dɑŋɑ, kɑ wǝr
kɑ kɑɣɑɑ:  Jornɑ yɑɣǝʋ.

Lɑ lor
nɛɛ lɛɛ kɑ ʋ kɑɣɑɑ: Mɑ kɑɑ tɔɔɣɑ mɑ jǝtǝ
ɑrɑ kɑ wɑ fɛɣii
jɑŋmɛnɣʋ ɑŋʋ ǝn
mɑɑɣǝʋ. Mɑ nɑ lǝɣɑʋrɑ hɑr wɑɑtʋ deʋ
kʋ nɑ̀ dɑnɑ nyɑm nyupǝ nɛɛ.

Kɑ bɑm nǝn kɑ lǝɣǝr kʋ nɛɛ lɛɛ gɔr
nyǝnǝ dɑfɑrsǝ nyǝsǝ pǝnǝnnɑ kɑ jernɑ sǝ tɛii.

Lɛɛ sǝ nyǝnkɑ kɑ: Jɑŋmɛn-te
nyɛɛ yii dɑn ɑn cǝn
nyɑm nyupǝ.
Dɛn jeepǝr ɑnǝ lɑ beʋrɑ tǝ mǝnǝn ʋ kʋnǝ.

Nyǝntǝrɣɑ kɑ: Mɑ kɑɑ cɑ dɑfɑrsǝ ɑsǝ ko jɑŋmɛnɣʋ cǝɣʋ. Ǝn tǝɣɑ mɑ wɑ cɛɣ. Deerɑ mɑ nɑ mǝnǝ ɑrɑ?

Lɑ wɑɑtʋ cɛɛ,
kɑ̀ jɑŋmɛnɣʋ be kɑ sirnɑ ku nyu nyɑm.

Nǝnnɑ nyǝntǝrɣɑ cǝɣɑ vǝr yisɔkɑ nyǝŋɑ.

Lɛɛ kɑ̀ jor dɑfɑrɣɑ nyǝŋkɑ nɑpǝ pɑɑɣɑ kɑ tǝllɑ kɑ ǝn
kɑ fɑɣǝrǝm mǝ nɛm.

Dɑfɑrɣɑ cǝɣɑ kɑ sekǝ pǝrɣɑŋɑ kɑ kɔɣii kɑ:
wɑɑɑi.

Lɛɛ jɑŋmɛnɣʋ cǝɣʋ yɑkǝllɑ kɑ deerii
kɑ derɑ kɑ feenii.

Yɑɑsi deʋ
nyǝntǝrɣɑ cǝɣɑ fɛɣiin jɑŋmɛnɣʋ ǝn mɑɑɣǝʋ le kʋ pǝsǝ kɑ nɛʋrɑ lee.