Pǝ̂rǝ ma ! Arà !
Amʊmpǝrǝ n ta wuu naa ace atɩ ri bʊsapɩ́ n'ɩbɔrɩ. Gʊɖo nɩ na baŋunii ba cee ɖa. Ba ɖa ba ɖa ma ni, acɩrɩsoro a shee ka lee bagʊyà.

Ʊshilé ɖǝn na acɩrɩsoro a lǝ ashee bʊsapɩ́ n'ɩbɔrɩ baŋunii wàà : « Ɩ ŋǝ ntoto nɖee n ɖa amʊnɖi laŋ wáá ma aa ? Ʊtonu na ba lee na njɩ. » Bʊkɔ́ɩ bʊ pala naa baŋunii ba na cu nɩ ma na gǝŋ.

Kaŋkǝlǝ́ nɖe, ba na kal ʊtonu na, n'ʊbɔlʊ nɖee ba na kirǝkirǝ ʊlakʊ laŋ naa ʊtonu ʊ cam ma na. Ʊshilé ɖǝn ma, ʊto a shee nyɩ páá ; halɩ atabɩyarɩ 'ʊbɔlʊ nɖee a na ɖʊ n'ʊtonu ma, ʊ ɖooɖoo. K'a sǝra a ɖʊ̂ ʊtonu asʊɖa n'abʊŋʊma na.

Galaŋ atabɩyarɩ a tǝm bapur acɩrɩsoro sul ɩ ta jɩ̂ wàà a taa shêe pɩ antoto kʊtonu.

Ba kpa acɩrɩsoro sul ma, ʊni k'a ɖa 'ʊshilé ʊsoŋsono nɩ na. Ŋkǝŋ na a kǝrǝ atabɩyarɩ bapur, naa abǝla k'a shee pɩ ʊtonu na.

Ɩ caarɩɩ atabɩyarɩ páá ɖaa bapi ba kɔɔ kɔɔ kǝ ba toŋo akoɖǝn na ma.

Ɩ lee cei sáà nɖee acɩrɩsoro a fol ma, n'atabɩyarɩ na bapur ba pɩ ba nyîm acɩrɩsoro antoto kʊtonu. Gaɖuɩ atabɩyarɩ a kulo ŋŋɔ ŋkɔnɔ acɩrɩsoro aŋku ŋkǝm ma na gǝŋ.

Naa atɔɔ ŋŋɔ ŋkɔnɔ nɖe aɖʊ asǝla n'acɩrɩsoro nɖee a ɖa na fol ma, antoto sul. Ama ŋŋɔ k'ɩ n cam na ntoto kʊtonu na. Ŋkǝŋ na atabɩyarɩ a fɔm ntoto nɖe laakaarɩ laŋ. Naa aŋǝ wàà, n ɖooɖoo.

Bapur gboo ba fɔm naa aŋǝ wàà, ʊtonu k'ʊ ɖa na. Na ba kam gɩlɛʊ.

Gɩlɛʊ gɩɖe gɩ ŋǝnǝ acɩrɩsoro, ncɩrɩnarɩ na bʊcɩrɩpiri. N'acɩrɩsoro a cǝpra antoto n'atabɩyarɩ agʊsaʊ naa aŋala wàà : « Ɩ sim ɩ cuu ! Asampǝna k'ɩ kpa anyɩn aa ? »

N'atabɩyarɩ a tǝlǝ ashee nɩ wàà : « Gɩ fɔm akɩntoto naa ayɔ akɩmpaapaa. Gɩ tɩɩ cê atɩ tam jɩ ashee bʊsapɩ́ n'ɩbɔrɩ basaaka. Ba taa câm n'akɩ ʊnyana ! »

Ŋkǝŋ n'ɩcɩrɩ ba kpa asampǝna naa acuu anyɔnna acɩrɩsoro. Ba tǝbǝ ŋŋɔ nɩ, naa asǝba na ɖa na bɛrɛ ɩfala nɩ.

Tɔɔ na kʊshilé na ɩcɩrɩ ba na cu ɩtabɩyarɩ naa naa ɖa na bɛrɛ naa akoɖǝn ɩ pàá tɩ lêe pɩ na.

Ampǝrǝ kɩɩja nɩ gǝŋ.

Ce livre a été traduit et publié par l'équipe anii de SIL à Bassila. Pour plus d'informations sur le projet anii et d'autres publications en langue anii, contactez-nous :

www.revue-gugu.org

+229 66 66 11 11
Téléphone et WhatsApp

L'équipe anii salue l'équipe de AfricanStoryBook et les remercie pour leur générosité et pour la licence de CC BY.

Mbʊpá nɖe n tɩ lǝ atʊ ɖaa acɩrɩsoro a paapaa bʊsapɩ́ n'ɩbɔrɩ baŋunii ŋŋɔ nɩ ma.