Kale saana, kwali abantu abaupeene babili abali abapiina. Mung'anda yabo mwalifye umwana umo uo batemenwe saana. Ishina lyakwe ni Chanda. Ilyo akulileko, abafyashi bakwe batontonkeye ukuti akaye mukwikala nabanalume abakankala ba Katebula. Ilyo talaaya banyina bamubiliile ifyakufwala ifisuma ifyakwete amaliboni namabatani noobulungu. Bamupangile notwakuikobeka mumukoshi. Elyo Chanda aimine ubulendo bwakuya kumushi kwa banalume.

Ilyo aendele intamfu iitali, afikile pakamana ako atolweke. Ilyo atolwekefye akamana, asangile umukashana uwa fwele ifyakufwala fyasampauka. "Uleeya kwi?" efyaipwishe umukashana. Chanda atiile, "Ndeya kuli bayaama ba Katebula. "Cawama. Ba Katebula naine ni bayaama. Naine apa uleemona naine ndeya mukubatandalila, natuye twendele chapamo, 'Twende babili temwenso" efyatile umukashana. Efyo baendele pamo. Ilyo baendelefye intamfu iinono, umukashana aebele Chanda ati, "Iyee! Ifyakufwala fyobe neefya kukobekakobeka fiisuma. Leka mfwaleko.

Elyo Chanda afuulile ifyakufwala fyakwe nookupeela umukashana. Chanda alipapile pantu ilyo umukashana afwele ifyakufwala fyakwe amwene ukuti aali noomucila. Calengele Chanda ukumfwa umwenso. Ilyo amwene ifi elyo aishibe ukuti kanshi uyu mukashana ni Nkalamo. Lilya baendakofye panoono, Chanda atiile, "Mpeela ifyakufwala fyandi noobulungu."

Nkalamo yatiile, "Leka mfwale ukufika pacimuti palya." Yasontele pacimuti caali palupili mupepi ifi. Ilyo baafikile pacimuti, Chanda aebele nkalamo ati, "Filya twacumfwana, mpeela ifyakufwala fyandi no bulungu." Nkalamo amwaswike ati, "Leka mfwale tufike peebala lilya." Yasontele palupili lwakonkelepo. Chanda noomwenso alisumiine.

Ilyo baafikile peebala Chanda alombele Nkalamo ati, "Mpeela ifyakufwala fyandi noobulungu." "Lekafye mfwale mpaka tufike pansaka apo abanakashi beekeele." Efyo inkalamo atiile. Asontele kunsaka iyaali apataliko. Ilyo baafikile pakayanda, Nkalamo asunkiile Chanda kunuma nookubutukila kuntanshi.

Nkalamo apundile umusowa uwu kulu kuli baanamaayo, "Moneeni uyu mukashana afwele ifyasampauka. Ankonkele akasuba konse. napapata muntafyeni aleeya." Baanamaayo baalipilbwike nookulolesha Chanda. Aali noomwenso saana icakuti abuutukile mwitanga lyang'ombe. Elyo INkalamo aile kung'anda yabanalume Chanda, ba Katebula. Lintu afikile aatile ati, "Nine mwipwa wenu Chanda. Abafyashi bandi nabantuma ukuti njise mukwikala naimwe."

Ba Katebula noolupwa lwabo, balimupokelele umukashana uyo kabili baalimutemenwe. Chanda mu bulanda aleele mwitanga kabili aliile ifyakulya fyambwa. Cilya bwacha alie belama mumabala elyo aleeimba ulu lwimbo: "Nacuula ine, nacuula ine. Baataata nabaamaayo bantumine mukwikala nabaayama ba Katebula. Munshila nakumenye Nkalamo abuula neefyakufwala fyandi noobulungu bwandi. Nacuula ine, nacuula ine."

Bushiku ubumo bwine ibeli lya ba Katebula umwaume aleenda mwibala elyo aumfwile ulwimbo lwabulanda. Taishibe uwaleeimba ulwimbo, leelo ilyo afikile kung'anda aebele baawishi ifyo aumfwile. Ba Katebula baaile kumabala. Ilyo baumfwile ulwimbo, baalilolekeshe nookusanga Chanda.

Chanda aebele banalume ifyacitiike fyonse. Ba Katebula bamusendele bamutwala kumushi nookumufisa mung'anda. Baalishiibe bwino ifyakucita pakwikata Nkalamo Ba Katebula baalishibe ukuti umucila wankalamo walitemwa umunani wankasha. Nkalamo teekuti ipite apali inaama ukwabula ukulyapo. Eco ba Katebula baatumine abantu baabo ukuti bembe icilindi icikulu nookwisushamo inaama.

Ba Katebula baalitile abakashana bonse abamumushi ukuti beese bangaleko ubwangalo bwakutoloka. Nkalao alisakamene. Taleefwaya ukutoloka icilindi. Aalishibe ukuti alaakwata icilaka canaama.    Aaingile mung'anda yaakakile saana umucila kumubili. Ilyo apwishishe aile ikala nabakashana bambi abaleeangalako ubwangalo.

Abakashana baatolweke icilindi umo umo. Inshita yaalifikile iyakuti Nkalamo atoloke. Aalyeseshe ukutoloka apatali leelo umucila walikakwike. Umucila waitintile panshi mpaka yapona na muchilindi umwali inaama

IlyoNkalamo aaleepalakata mumunaama abalumendo baayambile ukushiika icilindi noomucanga mpaka baishiikile yonse eyali empela ya ba Nkalamo. Chanda aikeele nabanalume inshita iitali munsansa.