Lotjha! Ibizo lami nginguNanu.

Sinomma silindele iteksi. Siya ekhaya.

Ngijame lapha emjejeni. Umma uvuma ingoma.

"Iza Baba uTeksi awuboni na? Mina noNanu sikulindile!"

Udade oseqadi kwami usa iinkukhu zakhe ekhaya.

Zizombekelela amaqanda ukobana adle.

Amadoda la abuya emsebenzini. Ayamomotheka. Ngiwezwa ayavuma.

"Nanu wekosi, ungatshwenyeki. Iteksi iza ngebelo sizokukhwela."

Udade uyadlula. Ungudade omuhle. Akasimahle amanyathelo wakhe?

Nakakhambako nje ayalila athi, "Tliki, tliki, tliki, tliki, tliki, tliki."

Indoda le ithengisa iinamaneyidi.

Ngithanda iinamaneyidi. Zimakhaza khulu begodu zinetjhukela. Uyazithanda?

Qala! Kunabodade abadla ukudla kwabo kwantambama safuthi.

Uyabona bahlakaniphile?

Udade loya wenza iinhluthu.

Uzozikhupha nabangani bakhe ntambama.

Sengidiniwe kwanjesi. Umma ungibhebhula emhlana ukuze ngiphumule.

Uvuma ingoma yakhe ethi, "Siyakubawa Baba uTeksi, ungaladelwa, ugogo usilinde eyegeni."

Nanguya umngani wami uTumi. Naye uphumulile.

Msinyazana sizabe sesifikile ekhaya.

Phezulu naziya iinyoni ziyaphapha ziya emakhaya wazo.

Kufanele zifike ekhaya ngaphambi kobana kurhwalale.

Udade lo unamacici amahle. Ngicabanga bona uwathenge edorobheni namhlanjesi.

Nangikhulako ngizokuthengela mina nomma amacici amanengi.

Umma sekathoma ukudinwa kwanjesi.

Ngimvumela ingoma, "Siyakubawa Baba uTeksi, akhese ufike, mina nomma sikulindile."

Lalela! Ngizwa umdumo weteksi!

Nasiya iyeza!

Le ngiyo iteksi yethu ebovu ekulu.

Izokuthatha mina nomma isise ekhaya. Ngithabe khulu!

Salakuhle!