Kalakalako yinyama nganiyikola ngongolo.

Yinyama yosope yagambaga kukwaŵa.

Ŵandupe ni ŵaŵakwete ngongolo sisyaliji syakupegwa ni a Magulu.

Lyuŵa line a Magulu ŵaganisisye yakupeleka ngongolo ku yinyama yosope.

Ŵalakwewo ŵasosile kuti yinyama yosope yijendeje.

Yinyamayo yatite, "Mpaka yiŵe yambone tuli tukwete ngongolo."

Yajimbile ni kuŵina.

Yinyamayo yatite kuti kukwaŵa kwaliji kwakusausya.

Yapikanaga kupweteka.

Pilyakwanile lyuŵalyo, yinyama yejinji yapite kumnango kwa a Magulu.

Swala, masimba, ndembo, acikalunga, ngwena ni yinjuni yajimi pa ndandala.

Cinyama cilicose ŵacipele ngongolo mcece.

Yijuni ŵayipele ngongolo siŵilisiŵili.

Cilicose caliji cakulekangana yijuniyo piyapocele ngongolopo

Yine yaŵinaga ligongo lya kusengwa, yine yagwaga.

Yapite kuja kwalanjisya ŵandu.

Yinyama yatite, "Uwe ngasitukwaŵa soni."

Ŵakumalicisya pa ndandalapo ŵaliji ce Lijongolo. A Magulu ŵawusisye kuti, "Ana pana soni ŵane kunyuma kwenuko?"

Lijongolo lajanjile kuti, "Iyayi, une jwakumalisya."

A Magulu ŵaganisisye, "Aŵa ni ŵakumalisya sambano. Cindende nasyo cici ngongolo syakusigalasi?"

A Magulu ŵapele ce Lijongolo ngongolo syosope sila.

Ce Lijongolo ŵasengwile mnope.

Ŵalakwewo ŵatite, "Cinjendeje mwakwanuya mnope kulekangana ni ŵanewo."

Ce Lijongolo ali atyosile, ŵaŵice ce Lijoka kumnango kwa a Magulu.

Ŵalakwewo ŵaŵendile a Magulu kuti, "Conde, mumbe none ngongolo."

A Magulu ŵatite, "Mbelece ngongolo syosope. Mwaliji kwapi?"

Ce Lijoka ŵajanjile kuti, "Nagonesye."

A Magulu ŵalolesisye kuti ninkaŵa paliji pana ngongolo sine sisyasigele.

Nganalusimana amta lumo.

A Magulu ŵasalile ce Lijoka kuti, "Pepani, pangali ngongolo syasisigele." Ce Lijoka ŵaliwutile ulendo wa kumangwawo ali ŵangali ngongolo.

Kutyocela lyele lyuŵalyo, ce Lijoka nganagonesya soni kwembeceya kuti caŵe ŵandanda pa ndandala ja ŵakuja kupocela ngongolo.