Kalekale pamalo ghakuŵetera nkhuku ghacoko ghapafupi na kamuzi kacoko.

Pakakhalanga kankhuku zina lake Daisy.

"Pala nakula nkhukhumba nizakaphululukenge mcanya, mcanya mumulengalenga." Daisy wakayowoya.

Kweni nkhuku zinyakhe zikamusekanga.

"Ndiwe wakuziziswa vyakucitika vyako," zikayowoya nkhuku zinyake.

"Tilekenge kuseŵera nawe."

"Daisy, tose tingamanya kupukusa maphapindo kweni
mphakusuzga kuti tiphululuke," Ŵanyina ŵakamuphalira.

Kweni Daisy wakaleka yayi. Nyengo zose wakayezgereranga kupukusa maphapindo.

Puku, puku, puku, wakapukusanga maphapindo kweni wakatondekanga kunyamuka kuti waphululuke.

Wacali kuyezgayezga kuti waphululuke, wakajiyelezgeranga kuti wakuphululuka mcanya mumulengalenga ndipo wakuona nkhuku zose zili pasi.

Wakajiyelezgeraso kuti wakuphululuka kuluska tuyuni tose. "Abekani!" Tuyuni tuyowoyenge. "Nkhuku yakuphululuka!"

Puku, puku, puku, nyengo zose Daisy wakapukusanga maphapindo ghakhe.

Wakanyamukanga kweni wakawangaso.

"Ningaphululuka yayi!" Daisy wakalira kuŵanyina. "Ŵanyane ŵakuneneska."

"Daisy, ndiwe wakupambana nankhuku zinyake. Zikukhumba yayi kuphululuka kweni iwe ukukhumba! Ungakwaniska," ŵakayowoya ŵanyina.

Namacero yakhe Daisy wakakwera pacanya pacitupa puku, puku, puku, wakapukusa maphapindo.

Wakaphululuka nakupukusa maphapindo, nakupukusa maphapindo, nakupukusa maphapindo…

Phuuu!

Nkhuku zinyake zikamuseka mwakucemerezga. "Ha ha ha! Tangukuphalira ise! Nkhuku zingaphululuka cala!"

Kweni namacero yakhe, Daisy wakakwera pacanya comene, pacanya peneco pa nyumba.

Puku, puku puku, wakapukusa maphapindo ghakhe.

Daisy wakaphululuka nakunjira mumphepo. Wakapukusa maphapindo ghakhe, nakupukusa maphapindo ghakhe, nakupukusa maphapindo ghakhe comene…

Wakaphululuka kwambula kulekezga! Mphepo yapasi pamaphapindo ghakhe yikakula ndipo wakaphululukira mcanya comene!

Ndipo tuyuni tukati, "Nchakuziziswa! Nkhuku yakuphululuka!"

Ndipo nkhuku zinyakhe zikakhumbanga kuŵa ngati Daisy.

Zikati, "Daisy ndiwe wakuziziswa!"