Kali ukongwa, kwenga musugwana yo wadanikanga kuti Kalabushi.

Kalabushi wenga mbeleŵeta. Chingana wuli anyina angumutcheŵesya kuti waleki umbeleŵeta, Kalabushi wanguvwiya cha.

Ankhazi aku Kalabushi ajanga silya linyaki ndi muzi wo wajanga Kalabushi.

Zuwa limoza ankhazi aku Kalabushi angutama. Engavi movwili.

Anyina aku Kalabushi enga akutangwanika ukongwa.

Chingana uli kwenga mudima, anyina angumutuma kuti wakapeleki chakulya kwa ankhazi ŵaki ŵeniwo atamanga.

Munthowa, Kalabushi wangukumana ndi Sinisoni.

Sinisoni wenga chimbwi kweni sonu wanguja kuti wasambuka munthu.

Sinisoni wangufumba Kalabushi wanguti, "Kumbi wapinganji?" Kalabushi wangumuka wanguti, "Ndapinga nyama, mazila ndi mukaka."

Anyina aku Kalabushi angumutcheŵesa kali kuti wangakambiyanga munthu weyosi cha vinthu vo wapinga.

Kalabushi wangulutiliza kuŵeleŵeta, "Ndamupeleka chakulya kwa ankhazi ŵangu."

Chifukwa chakuvwa lizgu lakuti 'nyama', Sinisoni wangwamba kumyanga milomu yaki.

Sinisoni wangutchimbiliya kunyumba kwa ankhazi aku Kalabushi. Kalabushi wazanga muvuli.

Sinisoni wangufikiya kuŵameza ankhazi ŵaki ŵaku Kalabushi.

Pavuli paki Sinisoni wangudika bulangeti lawu.

Nyengu yo Kalabushi wafikanga, pakhomu la ankhazi ŵaki penga waka kuti zii.

Kalabushi wangusele munyumba ndikwamba kudana, "Ankhazi, mwepani?"

Kalabushi wanguvwa mazgu nge ngosi cha. Wangusele muchipinda mwenimo ankhazi ŵaki agonanga.

Wanguzizwa kuwona munthu munyaki wadika bulangeti likulu.

Kalabushi wangufumba wanguti, "Ankhazi, ntchifukwa uli makutu nginu ngakulu musanawale?"

Sinisoni wangumuka kutuliya mukati muchibulangeti, "Kuti ndikuvwi umampha."

Kalabushi wangufumba so kachiŵi, "Ankhazi, ntchifukwa uli masu nginu ngakulu viyo musanawale?"

Sinisoni wangumuka wanguti, "Kuti ndikuwoni umampha."

Paumalilu Kalabushi wangufumba wanguti, "Ankhazi, ntchifukwa uli mulomu winu ngukulu musanawale?"

Sinisoni wangumuka wanguti, "Kuti ndikulyi!" Sinisoni wanguduka kutuwa pabedi ndikumumeza Kalabushi yuwa.

Kalabushi wangulutiliya kuŵeleŵeta chingana uli wenga mukati mulufu laku Sinisoni.

Wangufumba mafumbu nganandinandi waka.

Paumalilu, Sinisoni wanguvuka ndi unandi wamafumbu ndipu wanguŵanaŵana waka kuti wamuthunyi Kalabushi.

Kalabushi ndi ankhazi ŵaki angutasyika ndi ŵanthu amumuzi.

Kutuliya pazuŵa lenilo, Kalabushi wanguleka umbeleŵeta.