Kali-kali penga chikweta cho chenga pafupi ndi kamuzi kanyaki.

Kwajanga mwana wa nyoli munyaki wakudanika Daise.

"Asani ndakuwa, ndipenja kuziphululuka muchanya ukongwa," wangukamba Daise.

Kweni nyoli zinyaki zosi zingumuseka.

"Ndiwi wakuzizwisa," Angukamba anyaki. "Tiseŵengi nawi so cha."

"Daise, tingakhoza kuphululusa mapapa ngidu kweni nkhwakusyuzga kuti nyoli ziphululuki," angukamba Anyina.

Daise wangulekapu cha. Zuŵa lelosi wayeseliyanga pakuyija, kupukusa mapapa ngaki mwakuwelezaweleza, wapukusanga mapapa kweni watondekanga kuti waphululuki.

Wachiyesele, wangujiŵanaŵana kuti waphululuka muchanya ndipu watizilelesa nyoli zinyaki pasi.

Wangujiŵanaŵana kuti waphululuka kuphala Tiyuni. "Bama!" Tiyuni tezemukamba. "Nyoli yakuphuluka."

Kupu, kupu, kupu, zuŵa lelosi Daise wapukusanga mapapa ngaki.

Wakwanisanga kuphululuka kweni wawanga waka pasi.

"Ndezemuphululuka cha!" Daise wanguliya kwa Anyina. "Anyangu anenesa."

"Daise, ndiwi wakulekana ndi Nyoli zinyaki. Zikhumba cha kuphululuka kweni iwi ukhumba! Ungakwanisa," Anyina angukamba.

Zuwa linyaki Daise wangukwela pachanya pa chikutu kupu, kupu, kupu wangupukusa mapapa ngaki.

Wanguphululuka muchanya. Wangupukusa mapapa ngaki ndi kupukusa so mapapa ngaki.

Phwa!

Nyoli zinyaki zingumuseka ukongwa. "Ha ha ha! Tingukukambiya! Nyoli zingaphululuka cha!"

Kweni zuŵa lachiŵi Daise wangukwela muchanya ukongwa, mphaka pachanya pa nyumba.

Kupu, kupu, kupu, Daisy wangupukusa mapapa ngaki.

Wanguphululuka muchanya ndikupukusa mapapa ngaki, kupukusa mapapa ngaki.

Wangulutiliza kuphululuka! Mphepu ya pasi pa mapapa ngaki yingukuwa ndipu wanguphululuka muchanya nthazi!

Tiyuni tingukamba, "Ntchamunthondwi! Nyoli yakuphululuka."

Ndipu Nyoli zinyaki zapenjanga kuja nge iyu.

Zingukamba, "Awa Daise, ndiwi wamunthondwi."