Akabalilo kamu pa mugunda munandi papipi na kaya akanandi.

Pali akanguku ingamuyake Daisy.

"Ninga na kula, ngulonda nsaphulukege mwanya,mwanya fiyo," Daisy ayobile.

Loli inguku shosa shamusekaga u Daisy.

"Uwe we muzephano," Shayobile inguku sinyake.

"Uswe tupoleka ukwangala nuwe."

"Daisy, uswe tunkhafwanisha ukukwapusha mapapindo loli cikafu fiyo ukuti inguku yiphuluke," Ayobile umama wa Daisy.

Loli Daisy atalekile kugela kuphuluka. Isiku lililyosa akimanyisha yomwene, ukukwapusha amapapindo gake. Kwapu, kwapu, kwapu, akakwapusha mapapindo gake, loli atolibwaga ukwiyinula ukuti aphuluke.

Bo Daisy ikugela ukuphuluka, mwakupyanisha pyanisha, akifwanisha ukuti ikuphuluka mwanya nu keta inguku sinyake pasi. Daisy ifwanikishe mwene ukuti aphulukaga ukukinda imbelebeswa, sona akindile ni njuni. "Ehele!" Injuni sisoyoba. "Keta inguku yikuphuluka!"

Kwapu, kwapu, kwapu, Isiku lililyosya Daisy akwapushaga amapapindo gake.

Daisy akafwanisha ukwiyinula ukufuma pasi loli awa akabalilo kosa.

"Nthasofwanisha uphuluka une!" Daisy alilile kwa Mama wake. "Banyangu boyoba bwanaloli."

"Daisy, uwe utafwana ninguku nyako. Sitolonda pophuluka loli uwe ulonda! Unkhafwanisha ukuphuluka," Mama wake ayobile.

Kilabo lyake Daisy akwelile pa mwanya pa makwelelo. Kwapu, kwapu, kwapu, akwapwishe amapapindo gake. Daisy aphululwike mwanya nu kwapusha mapipondo gake, nukwapusha mapapindo gake, nukwapusha mapapindo gake kangi…

MBWEFU!

Inguku sinyake sha sekile fiyo, "Ha ha ha! Twakubulile! Inguku sitophuluka!"

Loli kilabo lyake Daisy akwelile pamwanya fiyo pa cikunda. Kwapu, kwapu, kwapu, Daisy akwapwishe mapapindo gake.

Daisy aphulwike mwanya nu kwapusha mapapindo gake, nu kwapusha mapapindo gake, nu kwapusha mapapindo gake kangi…

Daisy akundilishe ukuphuluka! Imbeepo kusi kwamapapindo gake yalyongelile amaka kangi aphulwike mwanya nu buka mwanya! Imbelebeswa ni njuni sinyabo shatile, "Shakuswigisha! Inguku yophuluka!"

Inguku shosa shalondaga ukufwana nu Daisy.

Inguku shatile, "Wee Daisy, yowe wakuswigisha!"