Esikhatsini lesindze lesengcile bantfu bebangati lutfo. Bebangakwati kulima tilimo, nobe kutfunga tindvwangu, nobe kwenta emathulusi ensimbi.

Nkulunkulu lokutsiwa nguNyame losetulu esibhakabhakeni bekanako konke kuhlakanipha kwasemhlabeni. Bekakugcine ngekuphepha embiteni yelubumba.

Ngalelinye lilanga, Nyame wancuma kutsi utawunika Anansi lembita yekuhlakanipha.

Ngaso sonkhe sikhatsi Anansi nakabuka lembita, bekafundza lokutsite lokusha. Bekumjabulisa kakhulu!

Anansi lobekanemhobholo wacabanga, "Ngitogcina lembita ngekulondzeka etulu esihlahleni lesidze. Kute ibe yami ngedvwa!" Wenta intsambo lendze, watsandzela ngayo imbita, wase uyibopha esiswini sakhe.

Wacala kugibela esihlahleni. Kepha bekumatima kugibela esihlahleni ngobe lembita beyimshayisa emadvolweni ngaso sonkhe sikhatsi.

Kwenteka konkhe loku indvodzana ya Anansi lencane beyimile ngaphasi kwesihlahla ibukela. Yatsi, "Bekungeke yini kube lula nawungabophela imbita emhlane wakho?"

Anansi wetama kubophela imbita labeyigcwele kuhlakanipha emhlane wakhe, futsi kwaba lula kakhulu.

Kungakapheli sikhatsi lesingako bekasasetulu esihlahleni. Kusenjalo wema futsi wacabanga, "Ngimi ngedvwa lokufanele ngibe nako konkhe kuhlakanipha, kepha buka nayi indvodzana yami ihlakaniphe kunami!"

Kwamtfukutselisa kakhulu loku Anansi kangangekutsi walahla imbita phasi esihlahleni.

Yaphihlika yaba ticucu emhlabatsini. Kuhlakanipha kwatfolwa nguwo wonkhe umuntfu.

Futsi ngileyo indlela bantfu labafundza ngayo kulima, kutfunga tindvwangu, nekwenta emathulusi ensimbi, kanye nato tonkhe letinye tintfo bantfu labakwati kutenta.