Sam ewa t̯ayari kwenda dzidzini haya haya magura.

"Hi ḅasi inafika saa ntahu," mamajwe kamwemweheka.

Sam ewa t̯ayari masaa mawii mapfema!

Sam na mamajwe wafika hapfa pfa kuiinda hi ḅasi saa 2:45 magura.

Wantu zaid̯i wafika kwe kituo cha ḅasi kaḅila ya saa ntahu za magura.

Hat̯a ḅaad̯a ya nusu saa ḅaḍo wekit̯ea.

Sam kanjia wasi wasi. "Mnamba e ḅasi iharibika," kat̯ara.

"Pfangine yeo ntahu kwakwenda dzidzini. Ambu sikwakupata hii yunifomu yangu pfya ya sikuli."

Saa 3:45 magura wantu wangine wafwa myojo na wachiya madzumbani.

Sam kaḍabva kuiiya. "Hujwa kuiinda muda muyeya kachuchu," mamajwe kanena.

Ghafla, wasikia saut̯i!

Hi ḅasi ifika saa nee magura.

"Njiyani! Njiyani!" huyu d̯ereva kawahana. "Huchelewa muuno yeo!"

Njiyani humu ḅasini na mukae chihako.

Hi basi inanuka kituoni saa nee na dakika kumi za magura.

"Eeḅasi inagala saa nyenga humusikahi?" mamajwe Sam kauza.

"Hi ḅasi ya zambarau inanuka dzidzini saa nane na nusu musikahi," huyu d̯ereva kadyibu.

Sam kat̯ara, "Hunafika dzidzini saa nsano magura."

"Hunawa na muḍa gaa dzidzini kabila ye ḅasi kugala?" Sam kamaka t̯u.

Maswali zaiḍi kuyawa ne ngano:
1. Sam ewa t̯ayari kwenda saa nyengaa magura?
2. Ayu Sam na mamajwe waiinda e ḅasi kwa muḍa
gaa?
3. E ḅas iichelewa kwa ḍakika nyengaa?
4. E ḅasi inahwaa ḍakika nyengaa kwenda dzidzini?
5. Sam na mamajwe wanafika saa nyengaa
mudzini kwao kona hi ḅasi ya zambarau inuka
dzidzin kwa wakat̯i?