Pantsiku inango sulo akhazunga m'phepete mwa gombe,
ndipo mbvuu ikhabzizungirambo icimbadya mauswa yakusvipirira m'phepete mwa gombe momwe mukhana sulomo.
Mbvuu iribe kuwona kuti sulo akhali m'phepete mule, na tenepo mbvuu idamuponda mwendo sulo.
Ndipo sulo adalira, acipfuwula aciwuza mbvuu kuti: "Iwe mbvuu uli kuwona lini kuti uli kundiponda mwendo?"
Ndipo mbvuu ire idamupepesa sulo iciti: "Pepa xamwali ndikhalibe kukuwona, ndikhululukirembo!"
Ndipo sulo alibe kufuna kubva, ndipo sulo ule adauza mbvuu ire kuti: "Wandiponda utowa, dikhira, unidzawona ntsiku inango, undzakhaula."
N'cadidi sulo adayenda kukapangana uxamwali na moto aciti: "Udzayende kukatentha mbvuu ikadzabula kunja kudzadya mauswa thangwe idandiponda."
Ndipo xamwali moto ule adatawira aciti: "Inde xamwali sulo, ndinidzacita bzomwe walewabzo."
Mbvuu ire idayenda kukadya kutali na gombe, ndipo mwadzidzi moto udagaka uciyamba kutentha ukuse bwentse bwa mbvuu.
Ndipo mbvuu idalira, icithawira m'madzi. Ndipo ukuse bwentse budamala kupsa na moto.
Mbvuu idalira iciti: "Ukuse bwangu bwapsa na moto. Ukuse moto wanditenthera. Ukuse bwangu bwamala kupsa, ukuse bwangu bwa bwino-bwino."
Sulo adakomedwa kwene-kwene pomwe mbvuu idapsa na moto, acilewa kuti: "Ndam'bwerezambo."
Na tenepo, mbvuu imbabula lini kunja kugopa kupsa pomwe na moto.