Khole ni Ekonya yaahipakana opatthani.

Awo yaanithweelasa vamosa. Yaanilyasa vamosa. Itthu soothene yiira vamosa.

Nihiku nimoha, Ekonya yaahitepa owereiwa enahala vakhaani okhwa.

Ekonya vaawehaaya otepa owereiwa yaahirowa wakhulukana, khuleeliwa wiira: "Mwaatthunaka ovona mukhuure enama ya khole."

Ekonya vaiwalaaya yaahitepa oriipiwa murima.

Ehinoona-tho makhalelo makina oowiira vahikhanle omukhuura Khole, mpatthani aya.

Khole vaavinyal'awe orowaka omuxikurya mpatthani awe, Ekonya yaahimukuxa Khole ottuli, emurowanaka mmuro vatthiyani voowiixa.

Ekonya yaahiira: "Mukulukhana ookileela wiira kaatthunaka ovona, kihaana wookhuurani, mpatthani."

Khole aahaakhula iiraka: "Nnaari mpatthani, muhikikhuure, miyo kootepa oyeva. Mukilipelele vakhaani kinrowa owiitthana apiipi. Awo khareere wunnuwa okivikana miyo."

Vano Ekonya yaahiira: "Ari woowi apip'inyu awo?"

Khole aahiira: "Awo ari ota, mwiiri ole vale."

Nto Ekonya yaahiira: "Mwaarowele wiira miyo kaakhuure."

Khole owo aahitupha ottuli iwo wa Ekonya orowaka ota, aahitthimakela owela mmwirini, okhala memmo. Ekonya yaahimulipelela. Ehinamoona Khole orwaaka.

Nno waari omala w'opatthani.