Muntũ wonthe naijĩ njogu ĩrĩ nyiũrũ ĩndaaja.

Ĩndĩ karaaja mono, nyiũrũ ya njogu yarĩ ĩnkuĩ na ĩnoru.

Kaana ka njogu karaciarwa. Nĩkendete kũmenya mono. Nĩ karĩ na biuria kĩrĩ nyomoo yonthe.

Nĩkendaga kũmenya mantũ ja Renyua. "Nĩkĩ tontũ ũrĩ na nkingo ĩndaaja?" karoria.

Nĩ kendaga kũmenya mantũ ja Cirua. "Nĩkĩ tontũ rũgoji rwaku rucomoki karomone?" karoria.

Nĩ kendaga kũmenya mantũ ja Kĩng'ang'ĩ. "Nĩmbi Kĩng'ang'ĩ kĩrĩjaga ũgoro?" karoria.

Nkũngũrũ ĩnjũme ĩramwĩra na mpwĩ, "Nthingata tũĩte mũũro rũũjĩne. Nau ũkoona kĩrĩa Kĩng'ang'ĩ kĩrĩjaga ũgoro."

Kwou kaana ka njogu karathingata nkũngũrũ mũũro jwa rũũjĩ.

Karaitonyithĩria matĩĩne ja mũũro kararũngama rũtere rwa rũũjĩ. Karategera rũũjĩne. Kĩrĩkũ Kĩng'ang'ĩ?

"Muuga," iga riarĩ rũtere rwa rũũjĩ rĩrauga. "Muuga," kaana ka Njogu karacokia. "Womba kũũmbĩra nĩmbi ing'ang'iri birĩjaga ũgoro?" karoria.

"Ĩjaĩja akuĩ na ngakwĩra," iga rĩrauga. Kaana ka Njogu karakwamĩria nkũrũki.

Orĩo, uui! Kĩng'ang'ĩ kĩrathara kaana ka Njogu kĩragwata nyiũrũ nkambatĩne ciakĩo.

Kaana ka Njogu kararikia nthĩ na magũrũ jako na gũkucia. Karakucia na karakucia. Ĩndĩ Kĩng'ang'ĩ kĩtarekeeria nyiũrũ yako.

Nyiũrũ ya kaana ka Njogu ĩrarea na ĩrarea. Na ĩrarea. Mwanka karagwaa. "Mpuu!"

Nyiũrũ ya kaana ka Njogu ĩrĩa yaarĩ ĩnkuĩ ĩraa nyiũrũ ĩndaaja.

Nyiũrũ ĩrarea ũrĩa arĩngĩũmba gũtua matunda kuuma bĩang'ine ĩguru.

Na mwanka narua Njogu cionthe cirῖ njara indaja na cĩaguitethĩa.