Mũrimi ũmũthĩnu arĩ na ndegwa ĩnkuru ĩtendete kurita ngũgĩ. Ndegwa ĩtendaga gucimba muunda jwa mũrĩmi. Yendaga gũkara nja na kũria nyaki, kũnyua rũũjĩ na kũnogoka.

Mũrĩmi narĩ na kinya ntigiri. Ntigiri na ndegwa ciarĩ acore. Ntukũ ĩkĩthira ndegwa na ntigiri nĩ ciaranagĩria. "Nĩ nogi mono," ndegwa ĩrauga. "Nditĩte ngũgĩ ĩnjũmo ntukũ yonthe. Mũraũ nĩ jũmũnene na jũmũrito. Mũrĩmi atĩmpejaga kaanya ga kũnogoka."

Ntigiri ĩrathũgania, "Ndegwa ka ĩri kĩgũta. Ĩtĩendaga kũrita ngũgĩ." Ĩrarĩra, "Gokũthũgania mũraũ jwaku nĩ jũmũrito? Mbĩtĩkia mũcore wakwa, ijũmũthũ! Nkamatĩre nkunia ya irio bibiũmo na mũgongo narua. Ĩgũkari ĩndiito nkũrũki ya mũraũ jwaku, ndĩ na mma."

Rũũnene nyomoo cio ijĩri iracemania kaĩrĩ. "Ngũkari na ntukũ ĩnthũũku narua," ndegwa ĩrauga. "Muunda jwa mwathi wakwa jũrĩ kũraja mono, na jũjũri maiga. Nditĩre ngũgĩ na inya ntukũ yonthe. Ntĩrona kanya ga kũnogoka."

"Nũritĩre ngugi na inya?" ntigiri ĩroria. "Narua mbitĩte rũgendo rũrũraja gwĩta thokone taũni. Nĩngwitĩkia nĩ nditĩte ngũgĩ ĩnjũmo nkũrũki yaaku."

Rũũnene, ndegwa ĩreja ĩcereri kaĩri. "Ũũũ, mũcore wakwa," ĩrera ntigiri. "Narua ĩgũkari ntukũ ĩnthũku mono kĩrĩ ni."

Ĩndĩ ntigiri ĩtendere kũthikĩra ndegwa.

Ntigiri ĩrauga, "Ũnogaga ĩgita rionthe. Rĩrĩa mũrĩmi akeja ũmame nthĩ na uuge, 'Moo! Moo!' Akathũgania kawajĩtue. Akũrekerie ũnogoke."

Ndegwa ĩrenda mathganio ja ntigiri. "Nĩ bwega mũcore, rĩu nĩ ĩthuganio rĩrĩega mono," arauga.

Rũũnene rũũkiri, ndegwa ĩramama na ĩramicia metho jayo. "Moo! Moo!" arauga.

Mũrĩmi aramĩtegera. "Ndegwa yakwa ĩnkũrũ nĩyajĩtũe," arauga. "Ĩndĩ no mwanka ncimbũre muunda jwakwa. Nũũ ũgantethia? Nonga ntigiri! Noo akũcie mũraũ narua."

Mũrĩmi araogeera mũraũ kĩrĩ ntigiri, na arambĩria kũmĩũra na mũcarica. "Ĩĩta na mbere! Na mpwi! Kuucia!" arera ntigiri.

Ntigiri ĩrarita ngũgĩ na inya ntukũ yonthe, ũgoro ĩrethĩrwa ĩnogi mono.

Ntigiri ĩraana nja mpaari ĩnogi mono. Ndegwa ĩreera ntigiri, "Ntindĩte bwega mono narua. Ndarĩa nyaki, ndanyua rũĩũjĩ na ndanogoka. Nĩnkwenda kũnogoka kaĩrĩ rũũjũ. Mpa ĩthũganio rĩngĩ."

Ntigiri ĩrathũgania, "Ngũgĩ yawe nĩ ĩnthũku nkũrũki ya yakwa. Ntĩkwenda kũmĩthithia kaĩrĩ rũũjũ." Ntigiri ĩrauga, "Menyeera. Mũrĩmi augĩre'ndegwa yakwa ĩthaĩrwa ĩnogi rionthe na nandĩ nĩyajĩtue. Kethĩra ĩtĩthĩrwa ĩbui rũũjũ, nkamĩũraga, na turie nyama."

Ndegwa ĩraguaa mono. Ĩrarĩra, "Niuu? Naugῖre ũũũ? Ũni ngaita ngũgῖ rũũjũ. Inkwigwa bwega nandῖ. Ntῖnogi buru!"