Kera habayeho abakobwa batatu, umwe muri bo akitwa Gasaro. Umunsi umwe bajya gutashya.

Hari mu mpeshyi. Bamaze gutashya bajya ku mugezi koga. Baridumbaguza biratinda.

Baza kubona ko bwije, bihutira gutaha.

Benda kugera imuhira, Gasaro yibuka ko yibagiriwe akanigi ke ku mugezi. Abwira bagenzi be ati: "Dusubireyo!" Bagenzi be baramwangira.

Gasaro asubirayo wenyine. Ahasanga akanigi ke, aragafata arataha. Ageze mu nzira arayoba kuko bwari bumaze kwira.

Aza kurabukwa hakurya urumuri ruturuka mu nzu. Ajyayo arakomanga.

Atungurwa no kubona ari imbwa imukinguriye. Iramubaza iti: "Urashaka iki wa mukobwa we?" Arayisubiza ati: "Nayobye ndashaka icumbi." Iramubwira iti: "Injira cyangwa nkurye!" Gasaro arinjira.

Imbwa iramubwira iti: "Ntekera!" Arayisubiza ati: "Sindigera ntekera imbwa!" Iramubwira iti: "Ntekera cyangwa nkurye!" Gasaro arayitekera.

Arangije iramubwira iti: "Nsasira!" Arayisubiza ati: "Sindigera nsasira imbwa!" Iramubwira iti: "Nsasira cyangwa nkurye!" Gasaro arayisasira.

Buri munsi yaratekaga, agakubura akanamesera imbwa. Umunsi umwe imbwa iramubwira iti: "Ngiye gusura inshuti zange. Nsange wakubuye, watetse wanameseye!"

Imbwa igitirimuka, Gasaro yipfura imisatsi itatu. Umwe awuzirika ku rutara. Undi inyuma y'urugi. Uwa gatatu awuzirika ku gikoni. Arangije akizwa n'amaguru.

Ntibyatinze imbwa iratahuka. Itangira guhamagara Gasaro iti: "Gasaro uri he?" Umusatsi wa mbere uti: "Ndi hano munsi y'urutara." Uwa kabiri uti: "Ndi hano inyuma y'urugi." Uwa gatatu na wo uti: "Ndi hano mu gikoni."

Imbwa ihita imenya ko Gasaro yayicitse. Ifata inzira iramukurikira. Isanga basaza ba Gasaro bayiteguye n'ibibando. Ibabonye isubirayo yiruka yiyemeza kutazagaruka iwabo wa Gasaro ukundi.