Ndi tshiṱori tshi no amba nga Vho-Londani na vhulondaphukha ha vhana vha zwipuka vha re tsiwana.

Ṅwedzi wa Ṱhangule wo vha wa u shumesa kha Vho- Londani na vhathusi vhavho afha vhulondaphukha.

Ho thoma u swika Mkite kuḓohwana kwa ṅwaha muthihi. Kwo swika nga ḽori dala ya kale.

Vho-Londani na vhathusi vhavho vho pfa vhuṱungu musi vha tshi vhona Mkite. O vha o sekena na u ṱungufhala.

Hu si kale Mkite kwa thoma u vha na nungo. Kwa thoma u tamba na zwiṅwe zwipuka afha vhulondaphukha.

Ḽiṅwe ḓuvha nga ṅwedzi wonoyu wa Ṱhangule ho mbo ḓi swika hiḽikhophutha afha vhulondaphukha.

Vho-Londani na vhathusi vhavho vha gidimela henengei. Nga ngomu ha hiḽikhophutha ho vha hu na kuḓohwana kwo puteliwa nga nguvho.

Ho vha hu Ndiwa. O vha e na maḓuvha maṱanu o dzwaliwa. Vho-Londani vha mu mamisa boḓelo.

Tsiwana ya vhuraru ye ya swika uyo ṅwedzi ho vha Malea. Yo swika nga ṱereṱere ḽitswuku. Yo vha i na miṅwedzi ya rathi.

Malea wa tshugulu o ṱavhanya a wana khonani i no pfi Enkare, ṅwana wa ṋari.

Vhuṅwe vhusiku vhathu vhoṱhe vho karuswa nga u swika ha Ambia.

Ambia o vha e na miṅwedzi miṱanu. U swika a si na nungo nga nṱhani ha lwendo lulapfu.

Ngauri mutsinga wa Ambia wo vha wo lapfesa, Vho- Londani vho mu nwisa boḓelo vho tou gonya muri.

Mafhaṱa maṱukuṱuku, Abei na Moit vho swika vhukati ha ṅwedzi uyu wa Ṱhangule. Zwitolo izwi zwo vha zwi na awara dzi si gathi zwo dzwaliwa. Zwi khou lwala vhukuma.

Vhathu vhoṱhe vho ṱungufhadzwa nga lufu lwa Abei nga murahu ha vhege u bva tshe a swika afha vhulondaphukha.

Tsiwana dza u fhedzisela u swika nga Ṱhangule ho vha Kopi, Kepi na Keji. Ndi zwiḓagaladzhie zwi re na vhege mbili. Zwo swika zwo farwa nga nḓala khulu.

Vho-Londani na vhathusi vhavho vho vha vhe na lufuno kha zwipuka zwoṱhe, hu tshi katelwa na zwi no silinga.

Ṅwana a no silingesa ho vha hu Lobolia. O vha a tshi dzumba ngilasi dza maṱo dza Vho-Londani.

Vhathu vha afha vhulondaphukha vha shuma nga nungo dzoṱhe musi vha tshi lela vhana vha zwipuka. Vha na fulufhelo ḽa uri ḽiṅwe ḓuvha tsiwana idzi dzi ḓo kona u ḓithusa nga dzoṱhe. Ndi hone dzi tshi ḓo kona u vhuyelela ḓakani.

Vhukale hazwo tshivhalo tshazwo. Vhalani itshi tshiṱori hafhu ni fhindule mbudziso. 1. Ho swika zwipuka zwingana vhulondaphukha nga Ṱhangule? 2. Ndi nnyi we a swika u thoma kha ṅwedzi uyu? 3. Tshipuka itshi tsho vha tshi na vhukale vhungafhani? 4. Zwipuka zwe zwa swika zwi zwiṱukusa ndi zwifhio? Vhukale hazwo? Wa kalesa ndi nnyi kha uyu ṅwedzi?