Furminginha gostaba di lé. Kes otu furminga ta fazeba el trósa tudu dia. Es ta flaba el, "Furmingas ka ta lé. Furmingas ta djunta kumida."

Furminginha ta pasaba dia interu ta lé.

Kes otu furminga ta pasaba dia interu ta djunta kumida pa invérnu (ténpu di friu).

Pai ku mai di furminginha fika xatiadu ku el. Furminginha xinti txeu tristi.

Na otonu óras ki fódjas kai di arvi, furmingas ten ki djunta ses kumida baxu txon.

Kel Rainha furminga ki ta manda, krê djunta txeu kumida. Tudu furmingas meste trabadja txeu.

Furminginha kumesa ta grita sobri kuzê ki el lé na livru.

"Nu meste bai un restoranti, un lugar undi bu pode bai pa kume. Nha livru ta pâpia di un restoranti."

Furmingas sai tudu djuntu. Es pasa dia interu ta djobe un restoranti.

Furminginha fla, "Odja, un restoranti!"

Kada un kumesa ta karega un padás di kumida. Alguns karega pon i otus karega karni.

Kantu es volta pa kaza Rainha furminga fika kontenti. Es tinha txeu kumida pa invérnu. Es fika txeu kontenti ki es grita di alegria.

Mai ku Pai di furminginha fika txeu kontenti ku el. Es da furminginha un abrasu fórti.

Se irman pega-l na mô i fla-l, "Gósi dja N ntende. Bu amor pa leitura ta pô-m krê lé livrus sima bo."