Kgale, kgale basetsana ba bararo ba ile ba sepela go ya go rwalela dikgong.

Letšatši le be le fiša tšhiri tšhiri, gomme ba ya nokeng go ya go rutha. Ba ile ba raloka ga monate, ba gašana ka meetse mola ba rutha ka meetseng.

Ge ba re phaphara, ba lemoga gore ešetše e le bošego. Ba sepela ba boela motsaneng.

Ge ba le kgaufši le gae, Nozibele a swara molala wa gagwe. A lemoga go re o lebetše pheta ya gagwe. "A re boeleng morago, ke a le kgopela hle." Nozibele o ithapeletša go bagwera ba gagwe. Eupša bagwera ba gana ba re e šetše e le bošego.

Nozibele a boela morago nokeng a nnoši. O ile a hwetša pheta ya gagwe a boela gae ka pela. Ka ge e be e šetše e le bošego, go be go le lefsifsi, o ile a timelelwa ke tsela ya go ya gae.

A sa le kgojana a bona go tuka lebone ngwakong o mongwe. O ile a phakišetša gona, a batamela mojako a kokota.

O ile a makala ge mpša e le yona ye bulago mojako. "O nyaka eng"? Gwa botšiša mpša. "Ke timetše gomme ke nyaka lefelo la go robala." Gwa realo Nozibele. "Tsena, e se go bjalo ke tla go ja." Gwa realo mpša.

Mpša ya re go Nozibele, "Nkapeele dijo" "Eupša ga sa ka ka apeela mpša dijo." Gwa araba Nozibele. "Apea, go se go bjalo ke tla go loma." Gwa realo mpša. Nozibele a apeela mpša dijo.

Gomme mpša ya re "Ntukišetše malao." Nozibele a araba a re "Ga sa ka ka lokišetša mpša malao" "Ntukišetše malao, go se go bjalo ke tla go ja", gwa realo mpša. Nozibele a lokišetša mpša malao.

Ka mehla, Nozibele o be a swanetšwe ke go swiela, go apea le go hlatšwetša mpša. Ka letšatši le lengwe mpša ya re, "Nozibele, lehono ke swanetše go etela bagwera ba bangwe ba ka. Ka moo o swiele ntlo, o apee dijo. O hlatšwe dilo tša ka pele ke boa."

Ge mpša e fetša go tloga, Nozibele a ntšha meriri e meraro mo hlogong ya gagwe. O ile a bea moriri o mo tee ka fase ga mpete. O mong a o bea ka morago ga mojako. Gomme o mong a o bea ka lešakeng. Gomme a kitimela gae ka lebelo le legolo.

Ge mpša e fihla gae, e ile ya nyaka Nozibele. "Nozibele o mo kae?"gwa goelela mpša. "Ke nna ye ka fase ga mpete" gwa araba moriri wa mathomo. "Nozibele o mo kae?" gwa goelela mšpa. "Ke nna ye ka morago ga mojako," gwa araba moriri wa boraro. "Nozibele o mo kae", gwa goelela mpša. "Ke nna ye ka lešakeng," gwa araba moriri wa boraro.

Gomme mpša ya tseba ge Nozibele a mo diretše makatika. Gomme ya kitima ka lebelo nako e telele go ya motseng. Ge e fihla gabo Nozibele ya hwetša bo butiagwe ba e letetše ka dikgati tše kgolo E rile ge e bona gore go hlafile, ya tšhaba e sa lebelele morago. Ya ba ge e le la mafelelo mpša e bonwa.