Óre apá té ápa, népuo intóyíe úni áaitayu ilkeék.

Néírowúaju enkólong olêng. Néjo peê épúo olkejú áar enkáré áairopije iséseni. Néígurân te átua enkáré.

Némanikí áajo emutó. Néísarrísar áashuko áapuo áng.

Óre etaá kébáya áng, néyiolóu Nozibele ajó meáta esaéi enyé. Nédamu ajo te olkéju etorikíne. Néjokí inkulíe tóyie peê erîk peê épuo áaing'óru esaéi enyé. Káke étányâ nenâ tóyie.

Néshuko Nozibele olkejú ópeny. Nétum esaéi enyé. Néísarrísar ashukó aló áng. Óre élóítô, némisimísu. Népong enkóítóí te enáímin.

Néduáya ewang'án natíi enkají te nélakúá. Néísarrísar aló ínâ ají. Néoshíosh metáboluní.

Óre embáe naing'ásiayie Nozibele náa, oldía ótaboló kútúkají. Néíkilíkuan ajokí, "káínyoo íyíéú?" Néwalikí Nozibele ajokí, "kátápóng'o áng náa káyíéú ewúéji náírrag." Néjokí ilô día, "tíjing'ú arashû ááóny." Néjing Nozibele atúa ínâ ají.

Néjokí oldía Nozibele, "téyierakáki endáa." Néwalikí Nozibele ajokí, "eitú áíkata ayieráki endáa oldía." Néjoki oldía, "téyiera endáa arashû ááóny." Néyier Nozibele endáa.

Néjokí oldía Nozibele, "íntobirakáki errúat." Néwalikí Nozibele ajokí, "eitú áíkata aitobíraki errúat oldía." Néjoki oldía, "íntobirá errúat arashû ááóny." Néítobîr Nozibele errúat.

Néaku Nozibele náyierakí oldía endáa, néorokí oltírén, néísujáki intokitín. Óre nabô oléng néjokí oldía, "kálo táatá aparán ilchoréta láainéí, néaku téyierisho, níór oltírén, nísuj intokitín étôn éítû alotú."

Óre aké peê eipáng oldía, néítayu Nozibele ilpápít okúni te elukunyá. Népik obô te áborí errúat, népik likái oríóng emilánko, népik likái olpááshíé. Néísik aló áng.

Óre peê eshukúnye oldía, néíteru aing'orú Nozibele. Nébuak aipót Nozibele, "Nozibele, kóreê iyíé?" Néjo olpapitá ótií abóri errúat, "néna nánú." Néjo olótií te óriong emilánko, "néna nánú." Néjo olótií olpááshíé, "néná nánú."

Néyiolóu oldía ajó éísíká Nozibele aló áng. Nélo ajó ásújaa, káke étímírâ iláláshera lé Nozibele te oo isiarén. Néísik ashukó aló entîm. Eitú áíkata eitokí ashukunyé.