Nale nale okwa li ofaalama i li momukunda wonhumba.

Mofaalama omo omwa li okaxuxwa kedina Daisy.

"Shama nda kulu, onda hala ndi kale handi tuka nda uka mombada mwii!" Daisy osho tati.

Ashike eexuxwa dikwao oda kala tadi yolo eshi Daisy ta ti okwa hala oku tuka.

"Ove ino tu fa mboli, ita tu danauka vali naave." Eexuxwa dikwao osho da ti.

"Daisy, fye eexuxwa iha tu tuka mumwange, oha tu papama ashike." Osho Meme e mu lombwela.

Nande a lombwelwa ngaho, Daisy i na sholola. Okwa kala noku li deula keshe efiku, ta papama. Papapapa, papapapa, ta papama, ashike pedu opo ngoo i ha di opo.

Eshi te li deula ngaho okwa kala noku li tungila ouumbo, afa ngeno e li wete ta tuka a uka mombada mwii, ye ta tale nee eexuxwa dikwao eshi di li pedu. Oku li wete ta tuka ta piti pookola nookaimbi. "Vakwetu, taleni oxuxwa ta i tuka!" oudila ngeno osho nee tava ti.

Papapapa, papapapa, keshe efiku Daisy ota papama, ta kendabala oku tuka.

Pedu oha di po ngoo, ashike iha i kokule manga i ne li ndangula po.

"Nghi na efiku ndi tuke mboli, vakwetu okwali ve li momdjila eshi tava ti eexuxwa iha di tuka." Daisy osho a popya nenyeme, ta lombwele Meme.

"Daisy, ino kwena. Ove ino fa eexuxwa dikweni. Ove owa hala oku tuka, do ina di hala oku tuka. Ino sholola, oto tuka ashike fiku limwe." Meme ta ti.

Mongula kushe Daisy okwa londa kombada yoshikuku, ta hovele oku papama. Okwa tuka nokuli a uka mombada omo, omavava aye taa papama. Opo ngo nee ngeno ta i kokule…

NDWANGU!

Eexuxwa dikwao ta di yolo nee mokule. "Ha ha ha! Otwe ku lombwela nale kutya eexuxwa iha di tuka!"

Efiku la shikula ko Daisy okwa londa kombada yonduda. Fiyo okokadutilo naana kwi! Ta hovele oku papama. Papapapa, papapapa.

Okwa hovela oku tuka a uka mombada mwi! Ta i nee a uka mokalemo…

Omhepo eshi tai pepe, ota i mu wedele ko konhapo. Omo a uka mombada omo. Ta shakeneke po ookola nookaimbi. "Vakwetu! Taleni oxuxwa tai tuka!" osho va ti nonghumwe.

Apa eexuxwa dikwao odi li po nee da fuuka. Da hala ashike ngeno nado otadi tuka.

"Daisy owe tu kimwifa shili!" Osho da ti.