Siruwo saka pita nare, kwa kere mukadona gedina Kalabushe.

Kalabushe nga uyunga unene. Nampili ngomu vamu rondwere ozina asi gaha uyunga unene, Kalabushe kapi ga purakenene.

Zinagona zaKalabushe kwatungire mesinya mwina lyomuramba lyomomukunda gwaKalabushe.

Ezuva limwe ga verere po. Ano kwato gumwe ogu gamu tekwire.

Ozina va Kalabushe kwa kere vana lipyakidire unene. Konyima zosiruwo kongurova yipo gaya twere Kalabushe nondya kozinagona ava va verere.

Apa ga zire, Kalabushe ga gwanekere naSinson. Sinson kwa kere embungu eli ngali lisintunuka morupe romuntu.

Sinson kwapulire Kalabushe, "Yinke ono simbi?" Kalabushe kwa limbwilire, "Ame kuna simbi nyama, mauta nomasini."

Ozina vaKalabushe vamu rondwere asi age gaha tanta asi yinke ga simbire.

Kalabushe simpe hena ga uyungire, "Ame kwa kutwara nondya konanegona vana kuvera."

Sinson kwa lipehere konomurungu dalyo kegazaro lyozo nyama ga simbire Kalabushe.

Sinson kwa dukire usimbu komeho zaKalabushe koko kembo lyozinagona vendi.

Makura age taka mina ozinagona vaKalabushe nokulikudumika monguwo zawo.

Apa ga kasikire Kalabushe, embo kwa kere tete sili unene. Age kwa zire monda nokuzigida, "Nane, kupi muna kara?"

Kalabushe kapi ga zuvhire ezwi lyozinagona. Makura age kwa zire monda zonzugo omu ngava rara ozinagona.

Yamu tetukisire apa ga mwene muntu ogu gali kudumikire monguwo zonene.

Kalabushe ga pulire, "Nane, morwasinke matwi geni gana nenepa ngoso neina?"

Sinson ga limbwilire konhi zonguwo zonene, "Yipo nikuzuvhe nawa-nawa."

Kalabushe simpe ga pulire hena, "Nane, Morwasinke meho geni gana nenepa unene ngoso neina?"

Sinson kwa limbwilire, "Yipo nikumone nawa-nawa."

Kalabushe moruhura ga pulire, "Nane, morwasinke kana keni kana nenepa unene ngoso neina?"

Sinson ga limbwilire, "Yipo ni vhure kukulya po!" Alyo makura kwa vatukire mombete nokuya mina Kalabushe.

Kalabushe simpe ga twikilire kuuyunga apa gakere mezimo lyaSinson. Ga pulire mapuro gomanzi.

Kouhura, Sinson gaya rorokere komapuro gomanzi gaKalabushe yipo lya tokwere limu fizemo.

Kalabushe nozinagona vanamukunda vava poperere.

Kutunda ezuva olyo, Kalabushe kapi hena ngauyunga unene kwava gadilire kudiva.