Gangwe ka letsatsi bese e kgolo e e talaloapi e ema kwa motseng wa ga Bubu go isa batho toropong. Bubu ga a ise a ke a bone bese e e kgolo jaana.O bala difensetere di le 9 tsa bapalami le e le nngwe ya mokgweetsi. "Go tshwanetse ga bo go le difensetere tse 9 tsa bapalami ka mela ya ditulo tse thataro bonnye." Bubu a akanya.
Fa Bubu a nepile, bese e kgolo e e talaloapi e kgona go pega bapalami ba le kae?
Kamoso, mmagwe Bubu o mo isa toropong go ya go reka yunifomo e ntšhwa ya sekolo. O rekisa dazene ya mae ka R15. Mo dibekeng tse dintsi o dira R450. O tlhoka go rekisa mae a didazene tse kae go dira R450? Mo dibekeng tse nne tse di fetileng, o kgonne go boloka halofo ya madi a gagwe go duelela yunifomo ya ga Bubu e ntšhwa.
A o ka bona karabo ya gore o bolokile bokae mo dibekeng tse nne?
E setse e le dikgwedi tse tharo fa e sa le loeto lwa ga Bubu la bofelo la bese.
Ga a kgone go leta! Kamoso ke letsatsi le legolo. O ne a setse a le mo bolaong ka ura ya bosupa, fela ga a kgone go robala. Ga a fetse go akanya ka loeto lwa go ya toropong. E setse e le halofo morago ga ura ya borobonngwe, fela Bubu ga a ise a thulamele.
Moso mongwe le mongwe, mmagwe Bubu o mo tsosa ka ura ya bosupa. Fela gompieno o setse a tsogile ka ura ya borataro, le fa a ile go robala ka ura ya lesomenngwe maabane bosigo.
Ka ura ya bosupa o setse a feditse go tlhapa le go apara a emetse go tsamaya. Bubu o robetse nako e e kae maabane bosigo?
Ka kotara pele ga ura ya borobedi Bubu le mmagwe ba fitlha kwa boemelabeseng. Bese e kgolo e e talaloapi e solofetswe go fitlha ka ura ya borobedi.
Mmagwe Bubu o lebelela tshupanako ya gagwe. Bese e kgolo e e talaloapi e setse e le thari ka metsotso e le lesometlhano. "Fela bese e tshwara nako ka gale. Ke makala gore mathata ke eng?" a rialo.
Ka nakwana batho ba le bantsi ba fitlha kwa boemelabeseng. Le bone ba lebelela ditshupanako tsa bone mme ba botsa gore goreng bese e le thari. "E setse e le ura ya borobonngwe. Ke ya go nna thari kwa tirong!" ga bua monna wa tlhogo e e letwadi ka sutu e e talaloapi.
Bubu le mmagwe ba letile nako e telele go gaisa. Mo go Bubu, go utlwala e kete ke diura le diura. Fela ga go a nna jalo. Ke nako e e kae ba letile?
Bubu o tshwenyegile. "A ke tla tsogile ke bone yunifomo ya me?" a botsa mmagwe.
Bubu o dira dipalo tse di bontshang gore loeto lwa go ya toropong le go boa le tla tsaya diura di le 4. Ura e le nngwe go fitlha kwa, diura tse 2 go reka le ura e le 1 go boa. "Ke na le motshameko wa kgwele ya dinao le ditsala tsa me ka ura ya bobedi. Ke solofela gore bese e tla fitlha gaufi kgotsa ga re kitla re boela gae ka nako."
Fela ba leta. Ga jaana Bubu o a lela. Batho ba le babedi mo moleng ba boela gae. Ba bangwe ba tswelela go lebelela nako mo ditshupanakong tsa bone.
"A re nneng pelotelele. Ke tshepa gore bese e tla fitlha gaufi," mmage Bubu a ba bolelela. "Ke batla go ya gae!" Bubu a lela."Metsotso fela e e lesome e nngwe," a mmolelela. "Fa bese e ise e fitlhe halofo morago ga ura ya borobonngwe re tla boela gae."
Fela ka nako eo ba utlwa bese e duma kwa tseleng. "O a bona ke go boleleletse," mmagwe Bubu a rialo. "Ke halofo morago ga ura ya borobonngwe mo tlhogong. Re tla reka dilo tsa rona ka bonako. Fa bese e ka tloga kwa toropong ka nako, re tla fitlha mo gae pele ga motshameko wa gago wa kgwele ya dinao."
Bubu o iphimola dikeledi. Maoto a gagwe a botlhoko. O lapile. O batla go ipona fela a le mo beseng.
Batho botlhe ba maketse, ga ise bese e kgolo e e talaloapi. Ke bese e nnye e e khibidu. Bubu o bala fela difensetere tsa bapalami ba le bane mo letlhakoreng la bese. "Mama," Bubu a rialo, "bese e e nnye thata go feta bese e e talaloapi. Ga go kitla go nna le ditulo tse di lekanang batho botlhe ba ba yang toropong."
A o dumelana le Bubu? A o ka phopholetsa gore bese e nnye e e khibidu e ka tsaya batho ba le kae?
"O tshwenyega thata Bubu," mmagwe a mo rumola. "Bonnye rona ba re leng mo boemabeseng re tla nna le ditulo."
"Ka bonako, a re palame gore re bone ditulo tse di siameng. Ke rona re letileng nako e telele!"
Bubu le mmagwe ba palama bese. Mo morago ga bone go na le batho ba bangwe ba le 9 mo moleng. "A go tla nna le ditulo tse di re lekanang rotlhe?" Bubu a botsa.
O kgona go bona gore go na le mela e le 4 ya ditulo mo beseng, ka ditulo tse 2 mo karolong e nngwe le tse 2 mo karolong e nngwe. Go na le ditulo tse kae ka palo yotlhe? A batho botlhe mo moleng ba tla kgona go dula?
Bubu le mmagwe ba tsaya ditulo tse 2 tse di kwa pele mo thoko ga lebati. Ba na le phatlha e ntsi mo pele ga bone le pono e ntle kwa ntle.
Bubu o bala batho ba ba ntšhwa ba barataro ba ba leng mo moleng. "Se se dira palo ya bapalami ba le 17 gotlhe," a akanya. "Mama, go na le ditulo tse di lekanang batho botlhe," a bolelela mmagwe. "Ke motho a le mongwe fela yo o tla tshwanelang go ema."
A Bubu o badile sentle?
Jaanong bese e tletse. Mokgweetsi o tswala lebati mme o a kgweetsa. Go na le modumo kwa ntle. Bubu le bapalami ba bangwe ba lebelela kwa ntle ka fensetere.
Batho ba bangwe ba bantsi ba tabogela go tshwara bese. Ba a goa, "Ema! Ema! Le rona re tlhoka go palama." Fela go setse go le thari. Bubu le mmagwe ba utlwela batho ba ba setseng kwa morago botlhoko.
"Ke eng fa o sa tla ka bese e kgolo e e talaloapi?" Mmagwe Bubu a botsa mokgweetsi. "E robegile maabane," a rialo. "Bese e nnye e e khibidu ke yone fela e neng e le teng."
"Jaanong batho ba ba setseng kwa morago bone?" Mmagwe Bubu a mmotsa. "Se tshwenyege," mokgweetsi a rialo, "Ke tlile go dira maeto a mabedi gompieno."
Bubu a reetsa fa ba bua. Dipalo di tletse mo tlhogong ya gagwe.
Bubu o bala ditulo gape. "Bese e e pega batho ba le 20, 16 ba ba dutseng le 4 ba ba emeng."
"Ke makala gore bese e tshwanetse go tsaya maeto a le kae go isa batho ba le 100 toropong? Ba le 200 bone kgotsa ba le 150? A ipotsa. A o ka batla karabo?
Bubu o itumetse. Gaufi o tla bo a na le yunifomo ya gagwe e ntšhwa. Mme bese e tla ba busetsa gae, ka nako go ya go tshameka kgwele ya dinao.